Love ko si doktora - Gula 2

“Kumusta ka na Marco,” matud sa doktora nga mihiling sa mga samad sa ulitawo diha sa iyang tuhod ug bukton. “Sakit pa kaayo dok ang pamatyag nako sa akong lawas,” tubag ni Marco ngadto sa batan-ong doktora nga mabalak-on kaayo ang panagway nga nagtutok kaniya. “Mangayo ko nimo’g pasaylo, ako maoy nagmaneho sa sakyanan nga nakabag-id nimo Marc,” sa doktora pa nga nagbarog sa kiliran sa ulitawo. “Ha? Aw, ikaw diay nagmaneho niadtong red nga kotse?” ni Marco pa nga daw dili makatuo.

Giangkon sa doktora nga iyang sala mao nga natumba si Marco. “Wala’y problema dok, sala ‘sab kadto nako kay wala man ko magbantay. Nagdali man gud ko kay exam man  namo,” pasabot ni Marco. “Usbon ko ang pagpangayo’g pasaylo kay gitug-anan ko sa kauban nako nga doktor nga nasuko kuno kaayo ka sa drayber nga nakadasmag nimo,” sa doktora pa.

Nahinangop kaayo ang doktora nga gipasaylo ra siya ni Marco. Nagkahigalaay sila’ng duha si Marco ug Dra. Marlyn. “Sagdi lang, akoy mangunay sa pag-atiman kanimo Marc bugti sa akong nahimong sala,” dugang sa doktora.

Sa tulo ka adlaw nga pag-estar ni Marco sa ospital, makadaghan nga higayon nga gibalik-balikan siya ni Dra. Marlyn ug nangunay g’yud sa pagtan-aw sa iyang panginahanglan.

Miabot ang higayon nga makagawas na si Marco sa ospital. Bisan og kuwartahan sila si Marco, apan mibulontaryo si Dra. Marlyn nga maoy moabaga sa bayranan sa ospital. Gitunolan niya si Marco sa iyang contact numbers sa dayon na nga pagsakay niini sa kotse nga gimaneho sa amahan sa ulitawo.

“Ingon ka nga kasuk-an nimo ang drayber sa sakyanan nga nakadam-ag kanimo, amiga man lagi mo kaayo,” matud sa daddy ni Marco nga ingon sa nangomedya sa iyang anak. “Wala na lang ko masuko dad kay maikog ko, gwapa man gud nga doktora,” ni Marco pa nga klaro kaayo nga nakagusto sa doktora. (Sumpayan)