Pahilakon mo diay ako

Malipayon kaayo ang managtiayong Mamerto ug Soling uban sa ilang mga anak nga sila si Belinda ug Ricardo. Gani magkadungan gyud silang upat sa pagsimba.

Pagkabuntag nananom sila og mga utanon, prutas, ug mga buwak kay inig dagko ila man ibaligya ni Sabeth ang suki nilang negosyante. Mahitungod ni Belinda adunay nangulitawo kaniya nga usa ka enhenyero nga si Inax. Ug managsilingan ra sila. Kay usa man ka enhenyero adunay mikuha sa iyang serbisyo sa Caloocan City sa Manila. Pagkagabii namisita siya sa dalaga. Ug wala siya pakyasa labi na kay buotan ang ulitawo.

Pila may dagan sa mga adlaw nanarbaho si Inax sa Manila kay aron makatigom og daghang kwarta. Tuod man natuman ang iyang gipangandoy. Ug mouli na siya aron mamalaye sa iyang hinigugma.

Sa adlaw’ng Miyerkules nanghipos nang daan sa iyang mga butang nga dad-unon kay inig Biyernes mopauli. Apan sa wala damha nibutho si Belinda. Unya nagpahibawo nga inig pauli mo diretso na lang sa sementeryo untop alas 3:00 sa hapon. Tuod man nakugang si Inax kay nilakaw man lang sab dayon. Sa adlaw’ng Biyernes didto na siya sa sementeryo wala pay alas 3:00 sa kahaponon. Apan sa kalit lang may dakong alibangbang itom nga naglupadlupad ug nitugdon sa tuong abaga ni Inax. Unya nilupad pahilayo kaniya. Wala madugay may nikuhit sa iyang luyo.

“Belinda, kuyawan man sab ta nimo kalit man gud kang nitunga!” ni Inax.

“Inax gimahal ko ikaw ... palihog gaksa ug hagki ko!” ni Belinda.

Unya sa kalit lang nidagan pahilayo si Belinda ug nahanaw sa iyang panan-aw. Iyang gitan-aw ang relo de pulos hapit na mag alas 3:00 sa hapon. Wala paabota, may  panon sa mga tawo nga nanagpayong nga nakita sa unahan. May usa ka porlon ang ilang gisunod. Wala magdugay untop alas 3:00 sa hapon. Mao sab ang pag-abot sa porlon. Unya giduol siya sa amahan ni Belinda.

“Inax, kanang sakay sa porlon mao si Belinda. Namatay siya atol sa adlaw’ng natawhan sa iyang higala kay niadtong higayona naligo sa dagat. Unya niadto sa lawom nga bahin, kay dili man kamao milangoy mao nga nalumos og nabugtoan sa iyang kinabuhi,” pasabot sa amahan ni Belinda. “Pero ako to siyang nakita kaganiha!” ni Inax.

“Nagpakita ang iyang kalag tungod sa imong kabuotan,” sa amahan ni Belinda.

“Belinda mahal ko ... kasakit ba sa imong giingong panagkita. Kinsay magdahom nga pahilakon mo diay ako!” (Katapusan)