Nakahukom si Ben nga iyang bisitahan si Zeny sa ilang dapit sa Boljoon.Sa iyang motorsiklo nga Honda 250 XR, kadiyot ra nga abton ang Boljoon gikan sa ilang lungsod sa Sibonga. Giandam niya ang pipila ka sapot kay nasiguro siya nga nindot ang baybayon sa Boljoon. Human makapananghid sa iyang inahan, gipabulhot ni Ben ang motorsiklo. Nahuna-huna ni Ben nga mosamot ang ilang panagsuod ni Zeny kun magkauban sila niini’ng weekend. Sanglit nindot ang karsada ug menos ra ang mga sakyanan, paspas kaayo ang dagan ni Ben ug dali ra siya nga miabot sa Boljoon. Giigmat ni Ben ang iyang mga mata kay anha siya pahunongon ni Zeny sa dapit nga adunay karatola nga Welcome to El Pardo.
Tuod, layo pa nakit-an na ni Ben ang karatola. Mihunong siya sa landong sa kahoy ug gikuot ang iyang selpon. Gitawgan niya ang numero ni Zeny. Nagkatawa si Zeny nga mitubag ni Ben kay anaa ra diay siya sa sulod sa usa ka tindahan duol sa gihunongan sa ulitawo.
Migawas si Zeny sa tindahan. “Sa ako ni’ng tiya nga tindahan. Tua ang among balay o, kanang gilibotan sa mga fruit trees,” matud ni Zeny dungan sa pagtudlo sa pinintalan nga balay nga nasalimbongan sa mga kahoy’ng prutas.
“Sakay diri, wala man kaha’y masuko kun moangkas ka nako,” matud ni Ben. Mikatawa lang si Zeny ug miangkas sa motor sa iyang amigo. “Ma, mao ni si Ben, kadto’ng akong giingon ninyo nga mitabang nako diha’ng na-stranded ang akong gisakyan tungod sa nabali nga acacia sa San Fernando,” ni Zeny. Mahinangpon nga giabi-abi si Ben sa mga ginikanan ni Zeny. “Nagdala ka’g masul-ob? Mangaligo ta’s dagat kay birthday man ni mother karon. Moanhi to’ng akong ubang ig-agaw taud-taud,” matud ni Zeny. Igo lang miyango si Ben ug mipahiyom. Ang tinuod, kaganina ra siya naibog nga nagtan-aw sa asul kaayo nga dagat nga lahi ra kaayo sa dagat sa siyudad. “Uban ba kanimo ang imong boyfriend sa atong pagpangaligo?” gisukna ni Ben si Zeny. (Sumpayan)