“Husto na,” ni Rey nga mibadlong sa madre. “Tingalig masuko ang imong bana.”
“K-kinsa?” Mikunot ang agtang ni sister Veronica nga misukna.
“Siya gud,” ug gipatugbaw ni Rey ang iyang kamot ngadto sa langit.
Nahikatawa si sister Veronica nga nahimuot sa pasiaw ni Rey. Apan ang iyang katawa misangko ngadto sa kaligdong sa panagway.
“Hinaut unta nga dili kini ang kataposan natong panagkita,” nakaingon ang madre. “Gusto gani ko nga dili una matapos kining higayona.”
“Kun pagbuot sa higayon,” ni Rey pa, “magkakita pa kita pag-usab. Apan kun dili na motugot ang kahigayonan, wala kita’y mahimo.”
Kahilom.
Pagkataudtaod, mihinay paglakaw si Rey. Apan igo lang siyang nakahimo’g pipila ka lakang, misangpit na usab kaniya si sister Veronica. Mihunong siya, mihinay pag-atubang ngadto sa madre.
“I-love you,” matud sa madre sa tingog nga tugob sa kaaghop.
“I love you, sister Veronica!”
Ug mitalikod si Rey. - Sumpayan pa