Gugma nga makabuang

Gula 5

Nalantawan ni Lino nga misakay og taxi si Nympha pag-abot niini sa MJ Cuenco Avenue gawas sa Plaza Independencia. Nakapangagho siya sa iyang gidangatan. Wala magdahom si Lino nga kadto maoy mahitabo sa ilang panagkita ni Nympha. Dili matuman ang iyang tinguha nga dad-on niya pag-usab si Nympha sa motel.

Mikalit paghuot ang dughan ni Lino nga naghuna-huna sa iyang kahimtang. Milingi-lingi si Lino sa palibot ug layo ra ang ubang mga tawo nga misuroy sa Plaza Independencia. Gipabuhagay niya ang mga luha aron sa pamasin nga mabanlas ang grabe'ng kasubo nga iyang natagamtaman. Nahuna-huna ni Lino nga ang nahitabo kaniya maisip tingali nga bawos na sa mga malipayong adlaw niya uban sa duha niya ka girlfriends kaniadto nga banus-banoson niya sa pagdala sa mabugnaw'ng lawak.

Samtang naglantaw si Lino sa nagkasawop nga adlaw, nakaagni kini kang Lino nga ipabuhagay ang tanan niyang kaguol. Miginhawa siya'g halawom ug daw giuyog ang iyang dughan.  Gipiyong ni Lino ang iyang mga mata ug gihukdong niya ang iyang ulo sa duha niya ka tuhod. Milabad ang iyang ulo nga naghuna-huna sa iyang kahimtang.

Nanumbalik sa iyang kaisipan kadtong mga malipayong mga adlaw nila ni Hazel ug ni Nympha nga parehong iyang gipasaligan nga dad-on sila sa altar sa simbahan. Mahinamon nga nagpaabot ang duha niya ka girlfriend nga tumanon ni Lino ang iyang mga saad.

Wala g'yud intawon sila masayud nga gilumpong diay sila ni Lino. "Moabot gani ang higayon Lin nga pul-an ka na nako ug mangita ka'g lain, mamatay tingali ako sa kaguol," matud ni Hazel usa ka higayon human sila maglipay-lipay.

Misantop usab sa kaisipan ni Lino ang gisulti ni Nympha kaniya. "Love tika kaayo Lin apan kun mahibaw-an nako nga dili ka matinud-anon sa atong gugma, itugyan ko ikaw sa imong laing GF bahala na og sakitan ko." Nagmahay g'yud si Lino nga gilumpong niya ang iyang mga girlfriend. (Sumpayan)