Nasakpan - Gula 7

Nasayod na g’yud ni Dave nga gibudhian siya ni Cherry. Mipaspas ang pagpanglugok sa luha sa iyang mga mata samtang nagsud-ong sa bayhon sa iyang asawa nga naghigda.

Gihugtan niya paggunit ang iyang pistola. Gi-chamber-load ni Dave ang armas aron pusilon na niya ang iyang asawa. Ang paka sa armas maoy nakapahigmata ni Cherry.

“Dave, ngano nga imo ko’ng gitionan?” matud ni Cherry nga gikulbaan pag-ayo. Paspas kaayo ang ginhawa ni Dave. “Mabudhion ka Cherry, bisan og pobre ko apan gitugyan ko kanimo ang walay kinutoban nga pagmahal, apan luyo sa akong kabuotan, imo ko’ng gibudhian,” ni Dave.

Wala dayon makatingog si Cherry. “Ayaw pagpataka og sulti Dave, wala kay kamatuoran,” ni Cherry pa. Gitug-an ni Dave ngadto sa iyang asawa nga gibutangan niya’g voice recorder ang iyang sakyanan ug nasuta ang iyang kabuang.

Mihilak si Cherry ug nangayo’g pasaylo. Nahinumdom si Dave sa sugo sa Ginoo nga gidili ang pagpatay. “Sigi, panghipos sa imong mga sapot karon dayon, ikarga sa imong awto ug layas gikan dinhi! Makapauli ka sa inyong balay o kaha moipon ka sa imong kabit. Pagdali!” singka ni Dave.

“Pasayloa ko Dave, pasayloa ko,” naghilak si Cherry nga nangayo’g pasaylo. “Kun dili ka molayas karon gikan dinhi, patyon ko ikaw,” matud ni Dave dayon nga pabuto sa iyang armas.

Nagdali si Cherry nga miabli sa tukador samtang naghilak. Gihan-ok ra ni Cherry ang iyang mga sapot, sapatos ug ubang butang sa baggage compartment sa awto. 

Wala na niya tiloka ang pagpanghipos sa iyang mga sapot. “Ayaw na pagbalik dinhi! Napupos ang akong pailob kanimo Cherry, babaye nga mabudhion!” laing lanog nga tingog gikan ni Dave.

Nakahilak si Dave sa mapaet nga kapalaran sa gugma nga iyang naangkon. Naglaom siya nga makakita pa’g laing babaye nga tinuod na gayud nga magmahal kaniya. (Kataposan)