Isla Paraiso

Gula 241

“Gisul-ob ni Rey kining maong kuwentas niadtong panahon nga gisulod siya sa hospital,” ni sister Veronica na usab. “Nakita ko kini sa iyang liog sa dihang ako ang nagbantay kaniya.”

Wala motingog si Benturada, miduko kini.

“Tug-ani ako sa tinuod, Benturada,” nagkanayon si sister Veronica. “Nasayod ka kun hain karon si Rey, dili ba?”

Wala’y tubag.

“Utang buot, Benturada,” nagmakiluoy si sister Veronica, “tug-ani ako sa tinuod.” Ug mihilak na gayod ang madre. ‘Hain karon si Rey.”

Niining higayona, ingon sa wala nay laing mahimo si Benturada kun dili ang pagtug-an sa tinuod. Gisuginlan niya si sister Veronica nga midangop kaniya si Rey. Apan paglabay sa kapin sa usa ka semana, mibiya kini sa iyang pinuy-anan.

“Asa man kuno siya paingon?” Nangutana si sister Veronica. “Matud niya, adto kuno siya sa dapit diin makabaton siya’g kalinaw sa hunahuna.”

“U-unsa?” Nakatuaw si sister Veronica nga kalit lang may milakdop sa hunahuna pagkadungog sa gisulti ni Rey kaniya kaniadto mahitungod sa dapit diin mabatonan niini ang kalinaw sa hunahuna. Apan naglisod si sister Veronica sa paghinumdom niini. “Mao ra kanay gisulti ni Sir kanako, sister Veronica,” puno ni Benturada. (Sumpayan pa)