Beauty Queen

Gula 5

Diha nga wala na gayo’y nangahas pagpalabaw sa dos mil pesos nga gitanyag ni Emerson, siya na gayud ang nakasayaw sa beauty queen.

“Dakoa sa imong gibayad uy.. kwartahan g’yud diay ning mga magbabalak no?” giingnan sa beauty queen si Emerson. “Queen Elizabeth man ang gibutang diha sa stage, imo ba kana nga ngalan?” ni Emerson.

Miyango-yango ang beauty Queen. “Ikaw, unsay imong ngalan?” nangutana ang beauty queen sa paraygon kaayo nga tingog. “Tawga lang ko og Merson, pero Emerson g’yud ang tinuod nako nga ngalan.”

Iyang gitug-anan si Beth nga dagsa lang sila sa mao nga dapit sa Barangay Binabag kay human nila matabangi ang mga pasahero sa naaksidente nga sakyanan, gidapit sila sa kapitan nga motambong sa kalingawan atol sa bisperas sa ilang pista.

“Maayo hinuon kay nakatambong ka sa among kalingawan,” matud ni Beth. “Daku ‘sab kaayo ang akong pagpasalamat kay gikaila ko ang labing maanyag nga babaye dinhi sa Barangay Binabag,” matud ni Merson nga nakapahiyom sa beauty queen.

Namakpak ang mga tawo. Diha pa sila makamatngon si Emerson ug Beth nga nangahuman na diay ang tukar apan diha pa sila taliwala sa sayawan lingaw kaayo nga nagsultihanay.

Gihatud ni Merson ang beauty queen didto sa iyang lingkoranan ug pagkahuman miadto siya sa lamesa ug gibayran ang dos mil pesos niya nga pagpalit sa buwak sa giila nga rayna sa mao nga kagabhion.

“Bilib na bilib na g’yud ko nimo bai. Wala maka-ek ang kaulitawhan dinhi diha’ng mitanyag ka na og two thousand pesos pagpalit sa buwak sa maanyag nga beauty queen,” matud ni Ronnie.

Miduol kanila ang kapitan. “Salamat kaayo dong, Merson.. Pinaagi kanimo nadugangan ang among kalingawan.”

Mitug-an ang kapitan nga iya’ng pag-umangkon ang beauty queen nga si Beth ug ang balay niini anaa ra sa unahan apan tua kini sa dakbayan sa Sugbo nagtungha pagka accountant.

“May boyfriend na g’yud na’ng imong pag-umangkon kap,” nagngisi si Merson nga misukna sa kapitan dala ang komedya. “Tingali kay tua man kana siya sa siyudad magtungha. Karon ra kana miuli nga hapit na ang pista,” matud sa kapitan.

Human sa kalingawan, miduol kang Merson si Beth ug gihatagan sila’g higayon sa kapitan nga magkasultihanay. (Sumpayan)