Nahatiurok si Rey nga naglantaw sa babayeng gikusogan pagbayle sa mga ulitawo, ning gipahigayong bayle kabahin sa nagsingabot nga kapistahan sa baryo Caduawan.
Gilingi niya ang iyang agaw Marman nga maoy nagdapit niya sa pagpamayle sa ilang baryo sa amihanang probinsiya sa Sugbo.
Taga siyudad si Rey ug misanong sa imbitasyon sa iyang ig-agaw nga modalikyat og bakasyon sa ilang baryo.
“Unsa man, duna na kay natripan nga babayeng baylehan, Gaw Rey...?” ni Marman nga mikihat kang Rey.
“Wa man god ko magdahom nga namayle sab diay dinhi sa Caduawan ang silingan kos Lorega, Gaw Mar...!”
“Mao ba? Silingan diay mos Emma sa siyudad, Gaw Rey? Naa siya mag-estar sa iyang tiya dinhi sa among baryo nga usa ka maestra! Guwapa kaayo si Emma, Gaw. Bigot kaayo’g lawas, mao nga gikusogan sa pagbayle sa kaulitawhan....!”
Nagyangoyango si Rey nga milantaw na sab kang Emma nga nakigbayle sa usa ka ulitawo sa baryo. Managsilingan sila sa Lorega. Halos kada buntag sila nga magkadungan sa pagpanambo sa bentana sa nag-atbang nilang balay.
Hilom nga naibog si Rey kang Emma. Apan igo lang siya sa ligaw-tingin. Usa ka call center agent si Emma, samtang si Rey usa ka regular clerk sa city hall ug misayidlayen sab sa pagka-real-estate broker. Mipalit og usa ka espesyal nga sweet music sila si Rey ug Marman. Gibaylehan dayon ni Rey si Emma nga nahikurat sa pagkakita sa ulitawo. Giparesan usab ni Marman sa pagbayle ang iyang uyab sa baryo nga si Joy. Dayon, gipabaylehan nila kini sa tanang kaulitawhan.
“Wa ko magdahom nga mag-abot ta’g pamayle dinhi sa baryo, Em....!” “Sus, nia man pod diay kas Caduawan, Rey...!”
“Gidapit ko ni Gaw Marman! Diritso na lang ko’g pamista....!”
“Aw, parehas diay ta, Rey! Gihawiran sab ko ni Tiya Mayling aron diretso na ko’s pista! Mi-leave ko’g two weeks sa call center nga akong gitrabahoan sa siyudad...!”
“Hasta ko, on leave sab og two weeks sa akong trabaho sa city hall nunot ang pamakak nga asikasuhon ang kabangian sa yuta dinhi sa baryo! Tayminga kaayo, aron magkasuod tang duha, Em! Managsilingan ta’s Lorega, apan di man ka managad nako...!”
“Ikaw nuon, Rey! Arte kaayo ka! Wa kay pansin nako...!”
“Sus, hagbay pa kong nainlab nimo, Em! Apan giluom lang nako...!”
“Ha....? Tinuod ka, Rey...? Abi nimo, huwat lang baya ko nimo nga manguyab ka nako....!”
“M-mao ba, Em? Kun mao, parehas diay ta nga inlab sa usa’g-usa, Em...?” “Kaayo! Ikaw man god, Rey, hinayan kaayo ka...!”
Tungod sa kalipay ni Rey, hugot niyang gigakos si Emma nga migakos usab og hugot kaayo kaniya. Nagkabag-id ang ilang kalawasan. Mitukod ang duha ka tugsoy sa dughan ni Emma sa maskuladong dughan ni Rey ug nagkabag-id ang duha nila ka pus-on, diin nabatyagan nila ang kainit sa boltahe sa duha nila ka gugma nga gitakdo sa panahon sa ilang panag-abot sa pagpamayle sa baryo niadtong gabhiona. (Kataposan)