Nahinangop kaayo ang kapitan nga adunay makabalak pahinungod sa beauty queen kay wala pa gayud mahiabot ang tawo nga iyang gitahasan.
Gipasugdan dayon sa kapitan ang kalihukan sa koronasyon. Gipangulbaan si Ronnie kay nagduha-duha siya pagtuo nga maantigo mobalak ang iyang higala nga si Emerson.
Wala masayod si Ronnie nga makamao mohimo mobalak o kaha mo-memorize og balak ang iyang amigo. Nakita ni Ronnie si Emerson nga miduol sa operator sa sound system ug mora’g adunay gipangita sa laptop nga gipatong sa lamesa.
Gitunol sa operator ngadto kang Emerson ang head phone ug dayon iya kini’ng gisul-ob. Miyango-yango si Emerson ug gibalik ang headphone ngadto sa operator. Mihatag pa kini og dugang instruction sa wala pa mobalik sa nahimutangan ni Ronnie.
“Tininuod g’yud ning imo bai nga ikaw ang mobalak?” gisukna ni Ronnie si Emerson nga ingon sa naglisod pa sa pagtuo nga mobalak ang iyang amigo. Mihugyaw ang mga tawo diha nga gipurong-purongan na sa iyang korona ang napili nga beauty queen! Giduol siya sa kapitan. “Imo na’ng turno sa pagbalak dong,” matud sa kapitan. Gianunsyo dayon sa kapitan nga gikan gayud sa dakbayan sa Sugbo ang tawo nga iyang gikuha aron sa pagbalak sa napurong-purongan nga beauty queen.
Misaka si Emerson sa bantawan ug miatubang sa beauty queen nga naglingkod sa iyang trono. Giluhod ni Emerson ang tuo niya’ng tuhod agi og pagyukbo sa rayna sa wala pa siya mobalak. Dayon, miatubang si Emerson sa katawhan nga mahinamong nagpaabot sa iyang pagbalak. Diha-diha, milanog dayon gikan sa upat ka dagko’ng sound boxes ang instrumental nga Love at First Sight. Hilom kaayo ang mga tawo nga nagpaabot sa una’ng han-ay sa mga garay nga litokon sa siyudadnon nga si Emerson pahinungod sa beauty queen.
“Mahal nga rayna niini’ng kagabhion! ang imong katahom nahisama nianang mahayag kaayo nga bulan, kang kansang katahom gialirongan ug gipurong-purongan sa kabitoonan!” milanog ang tingog ni Emerson dungan sa pag-atubang niya pagbalik sa beauty queen.
“Dili ako usa ka magsusulat! Dili usab ako magbabalak! Apan kining akong mga pulong nagagikan gayud sa kinahiladmang lawak sa akong kaisipan aron idayandayan ko sa imong dughan,” matud ni Emerson nga angayan kaayo nga miwara-wara sa iyang mga kamot. Nagpahiyom kaniya ang beauty queen. (Sumpayan)