Milabay ang mga adlaw, nagkasuod pag-ayo sila si Nestor ug Lanie. Sanglit edaran na man ang kauban nila nga kusinera, dili na kaayo kini makighugoy-hugoy pakigsultihanay kanila ni Lanie ug Nestor ilabi na kun lawom na ang gabii, dali ra kaayo nga matulog.
Usa ka gabii, bugnaw ang panahon. Nagkalingaw pagsultihanay sila si Lanie ug Nestor didto sa balkon sa ikaduha’ng andana sa balay. “Duna ko’y gipabugnaw nga tulo ka botelya sa beer tua sa reef, kuhaa palihog Lan,” gisugo ni Nestor ang dalaga.
Pagbalik ni Lanie, dala na niini ang tulo ka botelya sa beer. “Imo na’ng usa Lan, ubani ko sa pag-inom,” matud ni Nestor. Mibalibad si Lanie nga dili moinom apan nadala siya sa hangyo sa iyang agawon nga giisip ra usab niya’ng higala.
Mingislo ang nawong ni Lanie nga nakadimdim sa beer. Misamot nga naalegre ang ilang panagsultihanay. Dayon, nahilom kadiyot si Nestor apan mitutok kini pag-ayo kang Lanie. “Mahimo ba og manguyab ko nimo Lan?” matud ni Nestor nga maoy mibuak sa hamubo nga kahilom.
Napasiga ang mga mata ni Lanie nga nakadungog. Wala gayud siya magdahom nga isulti kadto sa iyang amo. “Kun imo ko’ng sugton Lan, ako ka’ng pakaslan. Biyudo na ako ug wala’y kabilinggan,” ingon sa mikalit kaseryoso ang ilang panagsulti.
Wala g’yud masayod si Lanie og unsay iyang itubag. Nahimo siya nga amang ug igo lang namati kang Nestor. Kalit lang usab nga mipasunding sa iyang kaisipan kadtong talan-awon nga nakita niya diha nga aksidente niya’ng nabuksan ang CR nga didto naligo si Nestor ug walay sapot.
“Dili ba gitug-an nimo nako nga gibudhian ka sa imong boyfriend? Dili ka magmahay kun imo ko’ng sugton Lan. Ikaw na unya ang ilhon nga hara niining akong panimalay,” matud ni Nestor. Napiyong ni Lanie ang iyang mga mata kay wala siya masayod unsaon pagtubag si Nestor.
Hangtud nga pagbuka sa iyang mga mata giagbayan na siya ni Nestor ug gipatikan na siya og mainitong hawok sa iyang mga ngabil. Mora’g gilumay si Lanie sa iyang agawon nga biyudo. Gipaundayonan na lang kini niya.
“Dili na ko mauwaw nimo Lan, total, nakit-an na man nimo ang akong lawas nga wala nay sapot,” matud ni Nestor. Igo na lang mipahiyom si Lanie nga nakahinumdom ug takulahaw lang nga may pagbati nga ingon sa kalit mihakop sa iyang kasing-kasing. Gihagkan siya pag-usab ni Nestor. “Tana, ubani ko sa akong kuwarto,” giingnan ni Nestor si Lanie dungan sa pagpatik og laing hawok. (Kataposan)