Gula 2
Si Nestor ang mibukas sa pultahan. Nasurpresa siya sa sayo nga pagbisita sa iyang amiga apan dali ra siya nga nakasabot diha'ng giingnan ni Lucing nga ang iyang pag-umangkon gusto nga mosulod og trabaho kaniya isip katabang.
"Bitaw, magkinahanglan ko og kauban kay mipahawa man ang katabang nako ug ang kusinera na lang ang nahabilin. Kami na lang duha dinhi sa balay, mingaw kaayo," matud ni Nestor.
Diha pa masayri ni Lanie nga si Nestor usa na diay ka biyudo. Namatay ang iyang asawa kay nadam-ag ang iyang gisakyan samtang mopauli na unta gikan sa ilang tindahan.
"Ayaw kabalaka Lanie kay kini si Nestor buotan kaayo nga pagkatawo," matud sa iyaan sa dalaga. Human magkasabot, nananghid si Lanie ug ang iyang tiya nga mobiya na ug mobalik ra sila inigkagabii aron dad-on na ang mga gamit ni Lanie.
Nasabtan tuod ni Lanie nga buotan si Nestor. Hinay kini nga manulti ug maila sa iyang panagway ang kabuotan. Pagka gabii, gihatud si Lanie sa iyang iyaan didto sa balay ni Nestor. Wala magdugay ang iyaan sa dalaga human nga napiyal na niya ang iyang pag-umangkon kang Nestor.
"Ayaw kabalaka kaniya Lucing. Sigurado ko nga maanad ra siya dinhi sa balay," matud ni Nestor sa dayong biya sa iyaan ni Lanie. Gipaila-ila ni Nestor si Lanie ngadto sa kusinera nga si Macaria.
Ang kusinera mimatuod usab nga buotan kaayo ang ilang agawon. "Buhong ka sa mga ipanghatag anang sir Nestor day basta magbinuotan ka lang," giingnan si Lanie sa edaran na nga kusinera.
Giubanan si Lanie sa kusinera paingon sa iyang kuwarto nga nahimutang ra usab sa silong sa balay. Luag ang kuwarto nga para ni Lanie mao nga nahinangop kaayo si Lanie sa iyang kahimtang.
Kontento ra usab si Lanie sa iyang starting nga suweldo nga P1,500 ang buwan. Dugay nga nakatulog si Lanie kay nabag-ohan siya sa dapit nga iyang nahimutangan. Didto siya sa gawas nagpahayahay dihang miduol kaniya si Nestor. (Sumpayan)