Balsa

Tay, ngil-ara na gyud sa karsada nato dinhi sa bukid. Wa na gyu’y makatungas nga sakyanan dinhi! ni Tatong, 7 anyos, nga nagdungaw sa yuta samtang nagsakay sa balsa tupad sa iyang Tatay Onyong. Molugsong sila’s lungsod aron palitan si Tatong og mga gamit sa iyang pag-eskuyla.

Grade one na siya.

Ang anopogong karsada nga bakilid, mora na’g sapa nga naughan.

Nangliki’g tagsa ka dangaw ug nagbawodbawod ang grano sa yuta kay way atiman sa gobiyerno. Resulta sab sa mga baha sa bukid dulot sa kusog nga mga pag-ulan. Biyente ka kilometro pa ilang latason gikan ning bukirang barangay sa Saniding ngadto’s Poblasyon sa lungsod sa Panikan.

“Kini diay’ng atong balsa. Katungas man ni. Naglugsong pa lang ta ron,” ni Onyong. Nagpahiyom.

“Natural. Wa man ni ligid. Kabaw ang makina. Ang mga de-ligid seguradong di gyud katungas dinhi!” ni Tatong. Nagpahiyom sab.

Ang bililhong tuyo ni Onyong sa paglugsong, ang pagtumod sa mga abot nila sa pananom. Gikamada ug gigaid sa sawog sa balsa ang mga sinakong lagutmon, utanon ug lamas. Upat ka sako tanan. Itumod nila sa merkado sa Poblasyon. Unya inig kahuman, palitan si Tatong og mga lapis, bolpen, papel ug notebook. Sayong buntag ilang paglugsong. Aron di kaayo sila mainitan sa adlaw.

Dugay silang nakaabot sa merkado. Kay natrapik sila sa highway. Dunay espalto nga karsada nga gibakbak ug gilukba. Aron pulihan og semento.

“Tay, hamis ug wa pa may libaong ang karsada nga gibakbak nila! Kun mao ni magpirmi, way purohan nga manindot ang mga karsada sa bukid,” ni Tatong. Subo ang tunada.

Nakalitan si Onyong. Wa katingog. Kay sa kalinghod sa isipan sa bata, nakapuntos sa iyang gipanulti. Ambot kun ang gobiyerno nakasabot ba ini? (Katapusan)