Milihok gilayon pagtawag og ambulansiya ang gisugo ni Capt. Benale nga si Corporal Benturada. Wala madugay nahiabot ang ambulansiya ug gidali pagdala si Rey sa labing duol nga tambalanan.
Ang mga patay gipanghipos sa kapolisan ug gihatod sa punerarya.
Milabay ang usa ka semana human niadtong hitaboa. Daw milagro nga si Rey nakalingkawas sa kamatayon bisan sa grabeng mga samad nga iyang naangkon. Apan madugaydugay pa ang paggawas niya sa tambalanan. Dili siya pagawason sa mga mananambal kun dili maalim sa hingpit ang iyang mga samad. Luya pa siya kaayo.
Samtang didto si Rey sa tambalanan, kanunay moduaw kaniya si Blessilda, ang anak ni Capt. Sancho Benale nga naluwas usab ni Rey dihang kini gi-hostage sa usa sa mga tulisan nga mitulis sa banko nga gialagaran niini. Magdala kini’g mga gasa alang sa pasyente.
Apan si sister Veronica gayod ang mitanod pagbantay kang Rey. Mopauli lang siya’g kadiyot sa kombento aron pagkuha’g sinina nga kailisan.
Mobalik usab siya dayon sa tambalanan aron pag-atiman kang Rey. Giisip niya nga usa ka dakong utang kabubut-on ngadto kang Rey ang iyang kaluwasan gikan sa mga kamot sa salbahis nga si Col. Martin Villadar. Gisugal ni Rey ang iyang kinabuhi tungod sa madre.
-- Sumpayan pa