Dinhi sa sityo Lunhaw’ng Lumot kusog na kaayo ang tabitabi nga si Paulino natakdan kuno sa pagka-ungo. Matud pa sukad kini nga si Paulino nagsige na’g kuyogkuyog ni Roman nga mangayohay’g television kun kini duna nay deperensiya.
Wala nay asawa ug mga anak kini si Roman kay matud pa gipamatay kuno ang iyang mga minahal sa kinabuhi sa didto pa sila magpuyo sa isla Pulang Saang. Ug tungod niini mibalhin og puyo si Roman dinhi sa sityo Lunhaw’ng Lumot. Ug nagkasuod sila ni Paulino ang anak sa kapitan dinhi sa ilang balangay.
“Unsa, kana si Roman usa ka mangtas nga ungo?†ni Sebyo pa nga miiknat ang bagaon niining kilay dihang nabati niya gikan kang Doloy ang bahin sa pagkatawo ni Roman. “Oo, uy, kay may nakakita nga nagtuwad kini sa daplin sa lugot,†ni Doloy pa. “Ug ang nakapait kay si Paulino natakdan na sab kay may nakakita nga nagtuwad diha sa may punoan sa abokado duol sa tabay.â€
“A, yamat ra, kadelikado gud anang imong estorya, Doloy, kun mao na peligro ta dinhi sa sityo kay magsige unya na’g panakod, na kitang tanan dinhi mamahimo unyang mangtas,†ni Sebyo pa ngadtong Doloy. “Unya unsa may aksiyon sa kapitan ini nga ang iyang anak natakdan na man kaha pagka-ungo?†“Ambot lang naa ra kana sa kapitan,†hinay’ng tubag ni Doloy.
Karong adlawa Sabado, ug dunay daghang naligo sa dagat. Kasagaran nga nangaligo mga bata. Hinuon, duna may mga kuyog sila apan may pagka kantilado ang dagat dinhi sa Lunhaw’ng Lumot ug daghan na usab ang nalumos. Ug karon, samtang saba kaayo ang mga batan-on kay nalingaw sa ilang pagkaligo, kalit lang may misinggit. Usa ka babaye ang misinggit kay ang iya kunong anak gianod sa sulog ug tua na sa may layolayo nga kantiladong bahin sa dagat. “Tabang moooo! Tabang tawon mooooo! Ang akong anakkkk, nagpungapunga na! Hu, hu, hu,hu!†lanog ang tingog sa inahan sagol hilak. Apan may kalit nga miabot, si Roman ug dali kining milangoy paingon sa lawom nga bahin sa dagat ug giluwas ang bata nga padulong na sa pagka-unlod. Ug nagpasalamat ang inahan sa bata kang Roman. Ug misamot ang pagtuo sa mga lumolupyo nga si Roman ungo gyud kay puwerting molangoy, sagitsit lang. Apan si Kapitan Magno miingon, “Kamo ba nga taga dinhi sa sityo Lunhaw’ng Lumot, sige lang mong duda kang Roman, hasta akong anak nga si Paulino inyong dudahan. Aw, ngano man diay gud kun matakdan si Paulino, maayo na lang ning ungo kay dili man mangunay og silingan...†Unya pagkasunod gabii may nakakita nga si Kapitan Magno nagtuwad ilawom sa tambis. (Kataposan)