Napordoy si Bosyong sa politika

Pekta, mosuway ko’g lansar sa politika dinhi sa atong lungsod aron makatagamtam ko og usa ka kinabuhing politiko nga dungganan ug respetado sa  katawhan.

Namulong si Bosyong usa ka gabii niana samtang nag-ihap siya sa kwartang halin sa ilang tindahan og kopras sa lungsod.

“Unsa may lansaran kuno nimo aber?, kaskas lang ka’s imong kwarta!” sukna ni Pekta kaniya.

Mitubag si Bosyong, “Ay da, molansar ko og pagka-mayor niining atong lungsod sa umaabot nga piniliay.”

“Baya nimo Bosyong, ako pa nimo mag-urong ka ... hilabihan ka gasto anang eleksyon pagpuyo oy!” “Paghilom diha Pekta magbuot ka man nako ... pasagdi gud ko’s akoang gusto maypag imo kong suportahan.” Tubig-tubigan ang kahimtang ni Bosyong ug sa iyang pamilya tungod kay gawas sa negosyong kopras aduna sila’y duha ka buok trak de pasaheroan sila wa pay labot sa mga yuta nga naprenda ngadto kaniya.

Usa ra kabuok ang ilang anak nga si Doray nga bag-ohay pa lang naminyo og taga-Davao. Gumikan lagi kay sapian man, daghan ang miabiba ug miulog-ulog kang Bosyong gikan sa snacks, pocket money, ug gasolina sa mga sakyanan panahon sa kampanya.

Gawas pa niini, daghan ang miduol kaniya nga mamaraye’g og tambal alang sa sakop sa ilang panimalay nga nagmasakiton. May namatyan usab nga mangayo og lungon alang sa minatay.

Kining tanan, gisagubang ni Bosyong gumikan sa paglaom nga modaug siya sa pagka-alkalde sa ilang lungsod. Apan unsang pagkabutanga nga gipildi man hinuon siya ni Amboy nga usa ka matadero sa merkado sa ilang lungsod.

Kadaghanan sa mga botante wala makauyon sa taras ni Bosyong nga hingulata sa iyang asawa labina kun mahubog. Wala usab sila makauyon sa timbangan sa kopras ni Bosyong nga tikasan ug sa dili sad niya maayong mohatag og sweldo ngadto sa iyang mga sakop.

Labaw sa tanan, wala sila makauyon sa pagpangimbargo ni Bosyong sa mga yuta nga naprenda ngadto kaniya.

Nabaligya ang mga trak de pasaheroan niya ug nabangkarota ang iyang tindahan gumikan sa daghang utang niini. Laktod pagkasulti,  napordoy si Bosyong sa politika! (Katapusan)