Nakita ni Rey nga nanglupad ang mga kaaway pag-ulbo sa ilang gitagoan nga iyang gitirahan sa makalilisang nga bala sa grenade launcher.
Gilabay ni Rey ang M-203 sa dihang wala na kini mga bala. Gikargahan niya og bag-ong magasin nga puno sa mga bala ang iyang Uzi. Ug giharong na usab niya ang nahabilin niyang mga kaaway.
Unya, samtang nagdagan-tago si Rey, wala niya paabota nga magkatagbo sila si Col. Martin Villadar. Nakalitan pag-ayo si Rey pagkakita sa koronel. Nasabot niya nga mao usab kini ang gibati sa koronel-nakugang usab kini. Unya kalit kaayong miligid si Rey sa dihang gipusil siya niini. Midali siya sa pagdangop sa usa ka dakong haligi nga semento.
“Corpuz!†Gisinggitan siya sa koronel. “Gahi ka gyud og ulo! Mao na kini ang imong kataposan!â€
Ug gipusil ni Col. Villadar ang iyang gipasalipdan. Daw gikitkitan sa mga bala ang sementong haligi. Gipaod pag-ayo ni Rey ang iyang lawas sa luyo sa maong haligi.
Karon nasabtan na ni Rey ang tanan. Dili na angay pang ipangutana nga si Col. Martin Villadar, kakunsabo sa mga tulisan. Natahap pa gani siya nga ang koronel mao ang nagbuhi sa mga tulisan nga naghatag og dili tiaw nga kahasol sa dakbayan sa Sugbo. Daghan na gani ang mga negosyante nga misibog sa pagbutang og puhonan gumikan sa kabalaka nga maalkanse ang ilang patigayon gumikan sa pagpanghasi sa mga tulisan sa dakbayan. -- Sumpayan pa