Dear Tita Salie,
Have a nice day. Just call me JJ, still single. Nakauyab ko sa una apan nagkabuwag mi. Nahigugma ko pag-ayo niya ug ako na nga nahatag ang akong kaugalingon. Maayo man gud kaayong modala og estorya ug nadala gyud ko sa iyang diskarte.
Aduna na sad ko’y laing hinigugma karon nga taga Saudi. Ako na siyang gisultian daan nga dili nako virgin. Apan bisan pa man sa iyang nahibaw-an padayon lang gihapon siya sa iyang pagpaninguha ngari nako. Ug matud pa niya nga iya kong anhion aron gyud nga magkita mi ug karon nang sunod buwan ang iyang pag-abot. Nahadlok ko kay wala gyud masayod ang akong parents sa among plano nga magkita mi.
Nahadlok usab ako kong magkita mi kay sure gyod ko nga mag-sex mi. Unya kun mag-sex mi unya tingali og dili nako niya balikon dinhi human nga iya kong matilawan. Palihog pasabta ko sa angay nakong buhaton. Daghang salamat sa imong pagtagad. -- JJ
* * *
Dear JJ,
Kinahanglan unta nga imong hunahunaon pag-una ang usa ka butang usa nimo buhaton, kun dili ba kini makadaot kanimo.
Ayaw na balika ang human na nimo nahimong sayop. Kun ang imong gihatagan og bili ang imong pagkababaye ug ang imong pagkatawo ayaw na usba pagbuhat ang imong nahimo sa imong hinigugma, JJ. Kinahanglan nga maniguro ka ug kanunay nga mag-amping sa imong pagkababaye.
Wala’y problema kun makigkita ka sa taga Saudi. Apan sa imong pagpakigkita niya hatagi usab og maayong dungog ang imong pagkatawo. Na-shock man gud ko sa imong giingon nga “sure gyod†ka nga mag-sex mo. Mao pa gani ang pagkita ninyo unya ingon niana kadali nimo nga i-surrender ang flag sa Pilipinas?
Kun ingon niana ang matang sa imong pagkatawo hayan mahitabo ang imong gikahadlokan nga tingali kun igo ka lang tilawan. Mahitabo gyud kini kun dili nimo usbon ang imong kinabuhi.What if mabuntis ka unya dili ka pa sigurado sa maong lalaki? Maong imong hunahunaon nga walay laing maalaot niini kondili ikaw ra usab. -- Tita Salie