Alas kuwatro sa kaadlawon nia na sulod sa ilang CR si Hector. Mao ning orasa iyang kasagarang imata mabuntag. Kay tag-alas otso sa gabii man sab siya matulog. Kining semi-retire na siya sa iyang trabaho isip CPA, tigsayo na siya’g katulog.
Kay daghan nang gipamati sa lawas. Kasagaran diabetes ug artraytis. Iya na lang gituman ang mensahe sa kanta niya sa grade four. Kadtong nag-ingon “Early to bed and early to rise. Makes a man happy and healthy and wise. Wise, happy and wealth.â€
Sa di pa maligo, daghan pa siyang seremonyas. Gidala niya ang arinola nga hamabaw sa ihi niya, sa iyang kapikas nga si Lita ug sa ilang apo nga si Fiona. Ipon nila iyang kinamaguwangang apo kay tuas probinsiya iyang mga ginikanan nagtrabaho. Mga magtutudlo sa saring publiko. Unya si Fiona, grade two na ug di mosugot iyang papa Jimmy ug mama Sonia (anak ni Hector) nga sa probinsiya siya motungha. Duawon siya’s iyang papa’g mama ma-Sabado ug Domingo sa balay sa apohan sa baryo Hubagil ning dakbayan.
Nisurok dayon ang dugo ni Hector kay wa niya makita ang gamit niya nga lalag nga baso. Gamit niya sa Urine therapy ang baso nga plastik. Ipon sa plastic nga sudlanan niya sa sipilyo, sabon, barbas ug toothpaste, ang maong baso. Malangan na kun mamukaw pa siya. Dakong gubot. Kay alas siyete pa magmata iyang mga sakop.
Gamit niya ang baso sa paglimogmog ug gargol sa kaugalingon niyang ihi nga init-init pa. Maoy sekreto niya sa iyang tingog na way karat. Dili siya daling mapagaw. Ug kun mapagaw man, labing dugay duha ka adlaw maayo na iyang pagaw.
Dili ni sekreto niya. Kay kun mangutana iyang mga kadyam sa sing-along nga mahibulong sa iyang batan-on pang tingog bisa’g nangapo na, sultihan niya dayon. Apan mangahilom.
Gawas sa limogmog ug gargol, gamit niya ang baso sa pagpanghilam-os, pamatiis ug panghunaw niya sa sulod sa arinola iyang gidala.
Wa siya’y laing nakitang baso. Ang bildo nga baso nga gamit ni Lita sa iyang panipilyo. Kay gihilabtan iyang baso, manghilabot na lang sab siya og laing baso. Total, iya mang hugasan pag-ayo inig humag gamit. Way kalibutan ang tag-iya sa baso. Pasensiya! Kay sa magubot sila. (Katapusan)