Romansa ug pag-eskuwela

Mapahiyumon si Abel nga naghandom sa iyang kagahapon kaniadto nga giliminan og mga pag-antos nga gibahogan usab  og mga romansa nga maoy nakatabang kaniya nga nakab-ot niya ang pangandoy nga tingusbawan.

Sa mata’g higayon nga mobukas na ang klase sa buwan sa Hunyo, takulahaw lang nga mosapigad dayon sa kaisipan ni Abel ang halandumon nga kaagi nila ni Rowena kaniadto diha nga nagtungha pa sila sa koliheyo.

Pareho sila’ng duha nga taga probinsya ug nag-abang lang og boarding house diha sa dalan Sanciangko, dili layo sa Cebu Central Colleges (CCC) nga diin sila pareho’ng nagkuha og kurso nga Education. Ang CCC kaniadto mao na karon ang University of Cebu.

Kinamaguwangan nga anak si Abel sa pito ka magsuon. Bisan tuod og ang iyang amahan nagtrabaho sa munisipyo sa ilang lungsod sa Ginatilan, apan dili kaayo daku ang suweldo niini mao nga apiki usahay ang iyang mga ginikanan ug dili dayon makapadala sa iyang panginahanglan.

Kanunay g’yud nga masakripisyo ang tuition fee ni Abel. Dunay mga examination nga matagbaw intawon siya pagpakiluoy sa opisina ni Atty. Augusto Go nga tag-iya sa tunghaan nga tugotan lang nga maka-take sa pasulit kay nalangan lang og abot ang iyang pangbayad.

Usahay makatulog na lang si Abel nga dili makapanihapon. Inigka-buntag, sayo siya nga molakaw ug moagi sa mamaligya og pagkaon sa aseras duol sa tunghaan. Usa ka puso ra ang iyang paliton nga paresan og ngohiong, dayon padunlan niya’g tubig. Giantos lang ni Abel ang kalisod kay pangandoy gayud niya nga makalampos sa pagtuon. Daku ang iyang utang kabubot-on sa iyang mga kauban sa boarding house nga misabot lang usab sa iyang sitwasyon.

Igsuon si Rowena sa kauban ni Abel sa boarding house. Tulo sila ka babaye nga nag-ukopar sa pikas kuwarto, samtang ang igsuon ni Rowena kauban ni Abel sa kuwarto nga iyang giestaran. Usahay makasabot ang mga amigo ni Abel nga natulog na lang siya nga wala’y kaon mao nga ila kini’ng agdahon. Usa lang ka sangpit duol dayon si Abel tungod sa kagutom. Dili usab masuko ang iyang mga amigo nga banuson niya pagsul-ob ang ilang sapatos kay wala man mapaliti og sapatos si Abel sa iyang mga ginikanan tungod sa kaapike sa panggasto.

Usa ka higayon, wala’y klase sila si Rowena ug Abel sa buntag. Nanuktok si Rowena sa iyang kuwarto kay nangutana kabahin sa leksyon nga wala kaayo niya masabti. (Sumpayan)