Isla Paraiso - Gula 184

Wala na maglangan og laing tipik sa gutling si Rey. Kinahanglang iyang masanta ang buot buhaton sa tulisan sa matahom nga babaye nga gi-hostage niini.

“Ayaw!” Misingit si Rey.

Wala ihinayon pagtampok sa tulisan ang balisong nga gikuptan niini ngadto sa liog sa babaye.

“Ihatag ko kanimo ang imong gikinahanglan,” ni Rey pa, “basta ayaw lang pasakiti ang babaye.”

“Maayo kun mao kana,” matud sa tulisan. “Sige, ambi na kanang imong armas.”

Usa ka paagi ang nahuna-hunaan ni Rey. Ug bahala na, iya gayod kining himuon. Usa ka pamasin nga maluwas ang babaye nga gi-hostage sa tulisan.

“Unsa pay imong gipaabot?” Ingon sa naglagot ang tulisan. “Ihatag na kanako kanang gigunitan mong armas!”

Dihadiha giitsa ni Rey ang Uzi nga iyang gigunitan ngadto sa tulisan. Apan wala niya kini itumong pag-ayo sa kaaway. Gituyo niya ang pagawhad niini’g diyotay aron saw-on.

Apan sa wala pa masawo sa tulisan ang Uzi nga giitsa ni Rey, ang abtik nga tinugyanan sa balaud nakabunot na sa .45 kalibreng pistola nga iyang gisuksok sa iyang hawakan. Dihadiha iya kining gipabuto tumong sa kamot sa tulisan. Naigo ang kaaway. Ug tungod ba kaha sa gibati niining kasakit, nakasiyagit kini ug nabuhian ang maanyag nga babaye nga gi-hostage niini. -- Sumpayan pa