Nangita sa lolo

Dear Tita Salie,

Maayong adlaw kanimo ug sa tanan nga tigbasahan sa lindog pasabta ko. Anyway, sige  gyod ko’g basa everyday gyod nako ni basahon ang pasabta kay daghan ko’g ma-learned.

Tagoa lang ko sa ngalan nga Jul, minyo na ko ug dunay duha ka mga anak. Ang akong problema mahitungod kini sa akong amahan nga sukad pa sa akong pagka tawo ug hangtod karon sa akong pangedaron wala pa gyod nako mailhi ug makita.

Gusto gyod unta nako nga mailhan ang akong amahan apan walay bisan usa ka tawo nga makasulti kun hain na siya karon. Bisan gani ang akong inahan wala nay kasayoran mahitungod sa akong amahan.

Ang akong mga anak nahisama na usab kanako kay magsige man sila og pangutana mahitungod sa ilang lolo. Kanunay silang mangita niini kay naluoy sila nako nga wala makit-i o makita ang amahan.

Unsa may maayo kong buhaton, Tita Salie? Palihog pasabta ko. Daghang salamat and God bless.

* * *

Maayong adlaw. Imong suwayan og adto sa lugar sa pamilya sa imong amahan kun taga diin kini siya. Imong pangitaon ang ubang mga igsoon sa imong amahan kay tingali kun duna sila’y kasayoran kun hain karon ang imong papa, tungod kay I am sure duna gyod kini sila’y contact sa usa’g-usa kun ugaling buhi pa ang imong papa.

Bisan pa man kun atua sa layong dapit ang imong amahan aduna gyod kasayoran ang iyang mga igsoon mahitungod sa iyang nahimutangan.

Mahimo usab nga imo siyang pangitaon diha sa facebook mamasin lang basin kun aktibo ang imong amahan sa maong kagamitan ug mao ra kini ang paagi nga imo siyang makit-an. -- Tita Salie