Mao pa si Rey makatugkad kun nganong may mga binuhat nga naghunos sa kaugalingong kinabuhi gumikan sa kapakyasan sa gugma. Hinuon, wala mahanaw si sister Veronica kaniya. Mahimo pa gihapon kini niyang makita. Apan karon, bisan pa’g mahiduol kini kaniya, sama sa atua kini sa halayo nga maabot lamang sa panan-aw.
Nianang pagkaugma, naudtohan si Rey pag-report sa kuwerpo sa kapolisan. Dili gani unta siya mosulod kay ingon sa wala sa kondisyon ang iyang lawas. Naapektohan gayod siya’g maayo sa nahitabo sa gugma nila ni sister Veronica.
Sulod sa buhatan, wala masulod sa hunahuna ni Rey ang iyang gibuhat. Si sister Veronica ang diha sa iyang hunahuna. Dili gayod kini malaksi sa iyang panumdoman. Nahisama kini sa iyang anino nga kanunay nagsunod-sunod kaniya. Wala magkadimao ang iyang pag-atiman sa mga bulohaton sa kuwerpo sa kapolisan.
Wala siya ganahing nakigsulti sa iyang mga kauban sa buhat. Nagpakahilom siya sa iyang lamesa. Nagmug-ot ang iyang hitsura nga giyungyongan sa kasubo sa balatian.
Si Corporal David Benturada nga maoy labing suod ni Rey sa ilang buhatan nakamatikod sa langyaw nga lihok nga gipakita ni Rey. Wala kini makapugong sa pagpangutana kaniya sa dihang nakahigayon sila pagsultihanay atol nga nagmeriyenda sila sa kantena dili layo sa ilang buhatan. -- Sumpayan pa