Isla Paraiso

Gula 175

Nagsusapinday na si Rey nga naglakaw. Sa gawas, mipara siya’g taksi. Nagpahatod sa balay nga iyang gipuy-an sa Mambaling.

Pag-abot niya sa balay, midiretso siya sa iyang lawak nga katulganan. Mihigda gipusdak ang iyang lawas sa kama. Unya mikulob siya. Giumod ang iyang nawong sa unlan. Wala siya’y kalainan sa usa ka bata nga giilogan sa mahalon niyang dulaan. Nagpuot ang iyang dughan.

Gimahal niya si sister Veronica nianang gugma nga tiunay ug putli. Gitingob niya ang paghalad sa iyang gugma ngadto sa babaye. Ang kapakyasan sa gugma nga iyang nasinati sa miagi. Niadtong wala pa siya sugta ni sister Veronica ug giayran niini ang iyang gugma, gisakitan usab siya niadto. Apan mas grabe ang kasakit nga iyang nabatyagan karon nga nagkahigugmaay na sila ug hinanali niining giputol ang ilang relasyon.

Alang kang Rey, ingon sa natapos na kaniya ang tanan.

Ang kalit nga pagkabugto sa relasyon nila ni Rey ug sister Veronica giisip sa lalaki nga usa ka trahedya nga midangat sa iyang kinabuhi. Daw sa nagun-ob ang iyang kalibotan. Ang kanhi malipayon niyang mga adlaw diin natilawan niya ang katam-is sa pagmahal sa babaye nga iyang gihigugma karon hag-as lang giitosan sa duga sa panyawan sa kapait.

Karon pa masinati ni Rey nga dili diay lalim ang mawad-an og hinigugma. -- Sumpayan pa