Isla Paraiso

Gula 169

“Daghan ako’g nakat-onan, Rey, sulod sa panahon sa atong panag-relasyon,” nagkanayon si sister Veronica. “Dili ko mahimong hikalimtan ang maong kasinatian, ilabi na gayod ikaw, tungod kay gitabangan mo ako aron mas molalom pa ang akong pagsabot ug pagtugkad sa mga tanghaga sa kinabuhi. Apan dili mahimo nga ipadayon nato kining maong relasyon.”

“Ug nganong dili man?” ni Rey pa. “May kagawasan kita nga mahigugma sa usa’g-usa. May katungod kita nga mahigugma.”

“Tinuod kana,” ni sister Veronica. “Apan dili ako angay sa imong paghigugma. Dili kita angay sa usa’g-usa. Busa putlon na nato ang atong relasyon.”

“Alang ikaw kanako, sister Veronica,” miinsister si Rey. “Mao kanay hinungdan nga gitagbo sa kahigayonan ang duha ta ka dalan.”

“May nanag-iya na kanako,” nagkanayon si sister Veronica. “Ug dili mo na ako mabawi pa gikan sa Diyos nga maoy tag-iya sa akong kinabuhi ug kalag.”

“Gipangayo ko na ikaw sa Diyos, sister Veronica. Ikaw ang tubag sa akong mga pag-ampo sa mga gabiing malaay nga akong gitukawan.”

“Dili, Rey,” ni sister Veronica pa. “Dili tinuod kanang imong gisulti. Wala ako’y pagbati nga ang buot mong mahitabo mao ang plano sa Diyos alang kanato.”

“Kana tungod kay wala mo patalinghogi ang singgit sa imong kasingkasing.” -- Sumpayan pa