Dear Tita Salie,
Maayong adlaw. Tagoa lang ko sa ngalan nga Denz, 20 years old ug usa ka ulitawo. Tigbasahan gyod ko kanunay esp. sa imong column ang pasabta ko.
Magpatambag unta ko nimo kay magul-anon kaayo ko karon. Ang nakahasol kanako mao kining akong gugma.
Duna man gud ko’y uyab, Tita Salie, nga love kaayo nako. Pero dihang nagpabasa siya sa baraha miingon ang tigbasa nga labangonon og lawod ang iyang mabana.
Unya duna ra ba siya’y ex, Tita Salie, nga taga Leyte apan nagbulag sila tungod sa walay maayong hinungdan. Nahadlok ko nga dili ako ang iyang mabana. Love baya kaayo nako siya ug dili ko gusto nga magkabulag mi.
Unsa may akong buhaton, Tita Salie? Ako kahang ipaglaban ang among gugma? Dili man god nako kaya nga magbulag mi. Palihog pasabta ko.Thank you very much and more power.
* * *
Maayong adlaw Denz,
Palihog ayaw himoa ang baraha ug ang manalag-an nga maoy nagmando sa kinabuhi sa tawo. Kun motuo ka sa tigbasa og baraha, sama ra usab nga imong gikuhaan og katungod ug gahom ang Diyos nga mogiya sa ilang kinabuhi. Sama ra nga miingon ka nga dili ang Diyos ang masunod sa atong kinabuhi kondili ang tigbasa og baraha.
Ayaw intawon kalimti nga duna tay magbubuhat ug siya ang magbuot ug iyang pagbuot ang matuman ug dili ang ato.
Busa ayaw tuohi ang tigbasa og baraha. Padayon sa inyong relasyon ug ipakita sa imong uyab nga karapat-dapat ka nga mamahimo niyang bana tungod kay tinuoray ka nga nagmahal kaniya ug kasaligan ka ug malipayon siya uban kanimo.
Ayaw hatagi og rason ang imong uyab nga maghandom sa iyang ex, ug makaingon siya nga mas ganahan siya sa iyang ex. Paningkamoti nga happy siya kanimo aron dili na siya maghandom sa iyang kagahapon. -- Tita Salie