Isla Paraiso - Gula 163

Ang mga pulong nga gipadayag ni Padre Judas ug ang mensahe sa mga bersikulo nga iyang nabasa sa Balaang kasulatan mitidlom pag-ayo sa iyang kahiladman.

Apan mas gamhanan alang kaniya ang impluwensiya sa mga pulong sa madre superyor. Mao kini karon ang nakapasamot sa iyang kalibog. Hain man ang husto? Kinsa kanila ang makatarunganon? Unsay angay kong buhaton?

Ug naglagot na siya sa iyang kaugalingon nga wala gayod makahagilap og tubag sa mga pangutana nga naglimin sa iyang galamhan.

Nag-ampo si sister Veronica. Nangayo siya’g espirituhanong giya gikan sa Makagagahom. Unya, tapos sa makuting pagtimbang-timbang, may usa ka hukom nga naumol sa iyang hunahuna.

Nianang pagkagabii, si Rey miabot sa Orchids Sister’s Convent. Gikan pa kini sa kuwerpo sa kapolisan. Naatol nga diha sa sala sila si sister Veronica, Padre Judas ug si Madre Superyor Dolores sa iyang paghiabot.

Ang madre superyor maoy nagpaila kang Rey ngadto sa pari. Naglamanohay ang duha. Maukobon nga gitutokan ni Padre Judas si Rey samtang nagpig-itay sila sa kamot.

Pagkilab sa pipila ka daklit, si Padre Judas gidala sa madre superyor ngadto sa luyo sa kombento.

Sila na lamang duha si sister Veronica ug Rey ang nahibilin sa sala. Apan walay usa kanila nga namulong. Mihasol ang kahilom. -- Sumpayan pa