Parehong gimahal

Dear Tita Salie,

Have a wonderful day. Just call me Sherah, dalaga. Naglibog na gyod ko sa akong kaugalingon. Mao nga magpatabang gyod ko nimo kay tingali kun maluagan kining gibati ko karon.

Duna man god koy uyab karon nga tagoon lang nato siya sa pangalan nga Hener. Love kaayo nako ning tawhana  ug love pod kaayo ko niya. Apan nagproblema ko, Tita Salie, tungod kay love pod kaayo nako hangtod karon ang akong ex-boyfriend nga si Dhanzkie.

Naglibog ko pag-ayo tungod kay pareho nako silang gimahal pag-ayo ug wala ko masayod kun unsay akong buhaton.

Karon kini si Hener kanunay masuko nako kay daghan kuno kaayong mga lalaki nga nakagusto nako ug laagan pa kaayo ko. Apan bisan awayon ko niya love gihapon nako siya. Unsa may maayo kong buhaton? Palihog pasabta ko, Tita Salie. Daghang salamat.

* * *

Hello Pagmata na ug ayaw na limbongi ang imong kaugalingon. Dawata na ang kamatuoran nga ang milabay-milabay na ug dili na imoha. Tingali ang imong ex-boyfriend karon aduna nay tag-iya. Busa himoa na lang siyang usa ka tipik sa imong kagahapon.

Ang imong gibuhat unfair kini ngadto kang Hener tungod kay kamo man ang manag-uyab apan duna pay laing nanag-iya sa imong kasingkasing. O imo gihapon nga gihatagan og luna ang imong ex diha sa imong dughan. Kun atong balihon ang sitwasyon, mosugot ka ba nga dunay laing babaye nga gihunahuna ang imong uyab?

Mas maayo seguro kun mo-focus ka na diha sa imong boyfriend karon kang Hener kun seryoso na ka nga makigrelasyon. -- Tita Salie