Sa unang pagtuyok sa kalibutan

Alas siyete sa buntag. Pasko sa pagkabanhaw ni Jesus. Nag-abot na sab sa plasa sa lungsod sa Amiraw si Iyo Berio ug Dodong. Unya nag-istoryahay dayon. Way laing balikbalikon ni Iyo Berio, nga siya di gyud motoo nga naay Ginoo.

“To see is to believe. Seeing is believing. Wa gyud ko kakita og Ginoo. O ebidensiya nga dunay Ginoo” ni Iyo Berio, 87 anyos, biyudo, retirado nga Customs Police. Nagbarog siya nga nagpanglantaw sa kabukiran luyo sa munisipyo.

“Siyaro sab nimo tiyo! Sulod ning gitas-on sa imong kinabuhi, wa gyud ka kasugat og kaalam nga makapaamgo nimo nga dunay Diyos?”ni Dodong, 57 anyos, magtutudlo sa Amiraw Central School. Nagtahod siya sa tiguwang kay ig-agaw sa iyang ugangan. Naglantaw si Dodong sa lawod atubangan sa munisipyo.

“Wa gyud” sa tiguwang. “Bueno, may tulo ko ka butang nga ibutyag nimo. Ikaw na lay timbangtimbang ini. Kun makombinsi ba tika nga dunay Diyos. Apan hibaw-i nga girespeto nako imong prinsipyo ug pilosopiya’’ ni Dodong.

“Unsa man na?” ni Iyo Berio.

“Una, ang distansiya sa Adlaw ug Kalibutan. Kinsa may nagsukod sa gilay-on tali sa kalibutan ug adlaw, diin ang kainit sa adlaw igo lang makapabunga sa mga tanom?

Dili makasunog niini? Ikaduha, kinsa may naghimo sa constellation nga Big Dipper nga maoy nagtudlo sa Polaris kon North Star? Unya sa panahon nga wa pay satellite, ang North Star maoy giya sa tanang barko latas sa dagkong kalaworan. Ikatulo, sa unang pagtuyok sa kalibutan, kinsa may nagbutang og timaan nga ang East, East? Ug ang West, West? Dili baya sa tanang higayon nag-atubang sa Adlaw ang East, ug nagtalikod sa Adlaw ang West” ni Dodong.

“Hmmmm!” nakahikap sa suwang ang tiguwang.

“Nimo pa, edukado ka. Nakahuman ka’g kurso. Kun maedukado na ang tawo, ma-ignorante na diay mahitungod sa Diyos?” ni Dodong.

“To see is to believe man gyud ko, Dong’’ ni Iyo Berio.

“Ang tawo naedukar gumikan sa mga libro sa tawong manggialamon. Kita naedukar mahitungod sa Diyos, sa Bibliya. Daghang rason nganong di na mopakita ang Diyos karon. Apan kun mobasa ka’s Bibliya, masayran nimo nga ang nakakita kang Jesus, nakakita sab sa iyang Amahan” ni Dodong.

“Mao sab lagi. Sinulat lang og tawo ang Bibliya” ni Iyo Berio.

Nahilom na lang si Dodong. Ug nihinay og lakang padayon sa iyang pag-hike.

“Ang tawong sirado og utok, bisa’g buk-on pa ang bagolbagol, di gyud maabli!” tuaw niya sa hilom. (Katapusan)