Isla Paraiso

Gula 158

Nahatan-aw si sister Veronica kang Padre Judas sa iyang nabati. May pangutana nga gilibkas ang iyang tinan-awan. “Anaa ra kanimo ang sulbad, sister Veronica,” matud  ni Padre Judas. “Kun andam ka nga moalagad sa Diyos mahikalimtan mo si Rey.”

“I can’t do that,” hinay nga tubag ni sister Veronica.

“I know that the spirit is willing but the flesh is weak,” ni Padre Judas pa. “Pag-ampo. Idangop kining tanan sa Diyos.

“Gibuhat ko na kana sa makadaghan, Padre Judas,” ni sister Veronica pa. “Apan ang naangkon kong tubag gikan sa Diyos sukwahi sa akong gipaabot.”

“Usahay ingon niana ang paagi sa Diyos sa pagtubag sa atong mga pag-ampo.”

“So, pagbuot diay sa Diyos nga magkatagbo ang dalan namo ni Rey pag-usab. Gipangayo ko sa Diyos nga dili ako itugyan sa tentasyon. Apan unsay nahitabo? Ang tubag sa akong pag-ampo niadtong mga gabii nga akong gihilakan dakong balit-ad sa akong gipangayo. Imbes nga iya kong ilikay, ingon sa misamot hinuon ka duol si Rey kanako.”

“Dili na ba gayod diay mausab pa ang imong hukom, sister Veronica?” Mitutok ang pari kaniya. “Mogawas ka na ba gayod sa kombento?” Wala siya motubag. Dihay pagtando nga giapura sa iyang hunahuna, apan wala kini malitok sa iyang dila. Mora’g dihay mihawid aron dili kini makalugwa. -- Sumpayan pa