Dear Tita Salie,
Maayong adlaw kaninyong tanan diha sa Banat News ug labina kanimo, Tita Salie.
Manghinaot ko nga unta imo kong matabangan niining akong problema karon tungod kay nahasol na gyud ko pag-ayo niini.
Maulaw man god ko niining akong ap-ap nga nia sa pikas sa akong nawong. Dako na man god siya ug maklaro na gyod. Maulaw ko, Tita Salie kay dalaga na man ko.
Unsa may tambal sa ap-ap, Tita? Dali ra ba ning tangtangon? Palihog pasabta ko. Thank you very much and more power.
* * *
Maayong adlaw,
Kun natural ra kini nga ap-ap wala kay angay kabalak-an tungod kay mawagtang ra kini sa kadugayan.
Imong anaron ang imong kaugalingon nga manglimpyo sa imong kaugalingon. Dapat buntag ug hapon manghilam-os ka sa imong nawong. Kun manarapo ka sa imong nawong paggamit og face towel o di ba tuwalya nga limpyo.
Sa gabii human nimo og panghilam-os, puwede kang mogamit og facial wash. Adunay daghang matang niini. Apan maoy gamita kanang klase nga dili ka alergy.
Mas maayo usab aron makaseguro nga magpatan-aw ka og dermatologist aron mahatagan ka og facial wash nga hiyang ka ug mobagay gyod sa matang sa imong panit.
Pero bisan sa sabon lang, kun kanunay kang limpyado sa imong nawong mawagtang ra gyod kini.
-- Tita Salie