Nagbitay sa hunahuna ni Veronica ang pangutana kun unsa ang ikasulti o reaksiyon ni Padre Judas sa higayon nga iyang masayran nga mogawas na siya sa kombento. Dili siya makahatag og tubag sa maong pangutana nga gisukot niya sa iyang kaugalingon.
Apan bug-os na ang hukom ni sister Veronica. Bisan unsa pay mahitabo dili na kini mausab. Kun magkasulti na unya sila si Padre Judas, ayohon lang unya kini niya pagpasabot. Nagtuo siya nga sama sa madre superyor, makasabot usab ang pari sa iyang kahimtang. Nasayod siya nga dili hiktin og panud-ong ang pari bahin sa usa ka butang.
Nianang pagka-alas dos sa hapon, mitawag si Rey sa Orchids Sisters Convent. Si sister Veronica gayod ang nakatubag sa tawag sa lalaki. Nangumusta kini kaniya. Gipasabot siya niini kun nganong wala na kini makaduaw sa kombento sulod sa miaging pipila ka adlaw. Busy si Rey. Daghan kini’g giatiman sa kuwerpo human niadtong gipahigayon nga operasyon diin ilang gika-engkuwentro ang mga tulisan apan wala nila mahurot pagpatay.
Si sister Veronica masinaboton kaayo. Wala siya mobati bisan diyotay na lang kahiubos bahin sa wala pagduaw ni Rey kaniya. Nakasabot siya sa trabaho sa ulitawo.
“Okey lang,†paraygon pa ang tingog ni sister Veronica. “Ang mahinungdanon mao nga wala ka maunsa sa miagi ninyong operasyon. -- Sumpayan pa