Natuman na

“Natuman na gayud...!” nakasinggit sa kalipay si Javier nga nagtindog sa natad sa ilang balay ni Nena,  ning buntaga nga nagsingabot na ang mga adlaw sa Semana Santa.

“Unsay natuman na, Jav...?” sukot sa iyang asawang si Nena nga mitambo sa bentana. Gikan sa kusina ang iyang asawa nga nagluto sa ilang pamahaw ug nagdaling mibiya, human madungog ang malipayong singgit sa iyang bana.

“Tan-awa sa atbang, Nen! Natuman na gayud ang gikatakdang demolisyon sa kabalayan nga naigo sa pagahimuong pagpalapad sa karsada, aron dili na gayud maglisod ang mga trak sa bombero, kun simbako, adunay sunog nga mahitabo ning atong dapit sa eskuwater...!”

“Nya, malipay diay ka, Jav? Kay abi, wa man maapil ning atong puwesto nga gitarokan sa atong balay ug sa atong kasilinganan? Luoy baya ang tag-iya sa mga balay sa kapin sa 30 nga nagpuyo nga naapil sa demolisyon ug wa nay kapuy-an...!”

“Di man tantong luoy sila, Nen, kay gihatagan man sila’g relocation site sa kagamhanan sa siyudad, pun-an pa sa kantidad nga gipabalon nila!”

“Bisan na! Lalim bay magtukod na sab og bag-ong balay. Hibulong ko nimo nga nagluksolukso man ka’s kalipay, Jav...!”

“Natural, Nen! Dili kay ako lang ang nalipay nga natuman na ang demolisyon sa atbang! Kun dili, ang tanan natong mga silingan. Ngano, kay naapil man sa pagdemolis ang kinoral nga balay nga gipanag-iya sa usa ka dangog nga drug pusher nga maoy gihimong suyopanan og shabu sa tanang adik-adik. Kanang balaya maoy gitawag og langob ning atong barangay, nga hasta ang mga estudyante ug mga batan-on ning atong dapit, anha na magsuyop nianang balaya! Na, 12 anyos na rab ang bugtong anak ta nga si Boyet. Dili ko gusto nga haduol siya nianang balaya nga suyopanan!”

Nahilom si Nena nga mibalik sa kusina aron ipadayon ang iyang pagluto. May punto tuod ang iyang bana. Dili gusto si Javier nga mahaduol ang ilang anak sa suyopanan nga balay nga maoy makaguba sa kaugmaon sa kabatan-onan.

Nagdagan si Boyet nga migakos kang Javier niadtong buntaga nga bag-o lang nahimata ug mikanaog sa natad.

“Pa, gipangguba na lagi ang mga balay sa atbang...!” “Oo, anak! Natuman na ang tanan...!” ug nagpahiyom si Javier nga miagbay sa iyang anak ug nanaka sila sa ilang balay nga malipayon. (Kataposan)