Tentasyon

Kay adlaw’ng Sabado ug bag-ong nakakobra sa senemanang suweldo, sadya kaayo sila si Tonton, Cocoy, Jaime, Nardo ug Kardo nga nag-inom sa suki nilang tindahan nga imnanan. Red Horse ang tirada nilang gitagay. Si Kardo nga unang higayon nga nakakuyog sa kaubanan niyang mga pintor, wa makabalibad sa inamotay matag usa, aron ipalit og usa ka kahon nga Red Horse.

“Unang higayon nga nakakuyog nato si Kardo og dyaming!” nagyangoyango si Tonton.

“Bitaw, nadala gyud nato’s Kardo! Pakisama gyud, Kards! Total, maghulat ra nato ang atong mga asawa....!” nagtingsi si Cocoy nga paspas kaayong miyarok sa iyang tagay.

“Di ta magpaander sa atong mga asawa, uy! Huwat ra na sila kun pilay atong iremit sa atong sweldo....! Lipay-lipay gyud ta....!” nagkihatkihat sab si Jaime nga kadali ra nga namula ang nawong.

“Dal-as itagay ning mga adlaw sa Semana Santa, kay mosamot atong kauhaw ...!” misagbat sab si Nardo nga mipasiklap kang Kardo.

“Natental gyud ko ninyo da! Nakasaad naman gud ko’s akong asawa nga di na moinom og ilimnong makahubog! Human ta’g inom sa sulod ning usa ka kahong Red Horse, mouna lang ko’g pauli ninyo, mga abay, ha!” nagpanglingo si Kardo nga nahinayak pag-apil sa tinagayay sa kauban niyang mga pintor.

Parehas og barangay nga gipuy-an sila si Kardo, Tonton, Cocoy, Jaime ug Nardo. Pulos sila mga pintor sa mga dagkong bilding nga konstruksiyon sa siyudad, matang sa trabaho nga maoy gibuhi nila sa ilang mga asawa ug mga anak.

Pagkahuman nila’g inom sa usa ka kahong, Red Horse, nanamilit dayon si Kardo nga mounag pauli. Naandan man gud niya nga moremit dayon sa iyang sweldo sa iyang asawa nga si Mila.

“Ayaw una’g pauli, Kards! Kuyog namong Cocoy, Jaime ug Nardo! Adto ta sa suki namong langob! Pasamot ba sa kundisyon...!” ni Tonton nga misenyas kang Kardo sa paghithit og shabu.

“Sus, ayaw tawon ko’g tentala ninyo, Ton, Coy, James ug Nards, anang bisyoha! Adlaw ron sa Semana Santa! Hunong na tawon mo anang bisyoha!” matod ni Kardo nga wa gyud magpatental sa kaubanan niyang pintor nga nagumon na sa paghithit og shabu ug midiretso sa pagpauli.

Pagkabuntag, sayo nga nahigmata sila si Kardo ug Mila. Nagkagubot ang ilang mga silingan sa preskong balita.

“Kards, nadakpan kuno sila si Tonton, Cocoy, Jaime ug Nardo kagabii sa nagrondang taga PDEA sa usa ka balay nga suyopanan. Nagtingkagol sa prisohan kay naaktohang naghithit og shabu!” matud ni Mila nga nahatutok kang Kardo.

Igo lang nakahangad si Kardo sa Kahitas-an. Nagpasalamat siya sa Ginoo nga wala gayud siya matental sa kaubanan niyang pintor kagabii. (Katapusan)