Ulahi na ang pagbasol

Gula 5

Gisugat ni Randy ang duha niya ka kaubang polis nga nag-uban ni Gelyn nga nagpatambal sa CCMC. “Salamat kaayo sir ha? Dia ra ang sukli sa gihatag nimo nga kwarta kay gipalitan man ni og tambal,” matud ni Gelyn dungan sa pagtunol sa kwarta.

“Ayaw, imo na kana ang sukli Lyn. Maayo na lang kana nga magamit nimo kay gagmay ra ba kaha ang ihatag sa imong kapuyo,” matud ni Randy. Wala motingog si Gelyn nga mitutok sa polis.

“Inig gawas nako dinhi, patyon na lang g’yud tika nga babayhana ka kay nganong report-report ka sa polis!” misinggaak na usab ang tingog sa kapuyo ni Gelyn nga didto sa sulod sa prisohan.

Misamot ang kahadlok ni Gelyn. “Ayaw usa siya’g buhii sir ha? Gikuyawan na g’yud ko kay basin og tinud-on niya ang iyang bahad. Molayas na lang g’yud ko sa among gipuy-an, makigbuwag na ko niya,” matud ni Gelyn.

Nakapanglingo-lingo si Randy nga naghuna-huna. Gilingi ni Randy si David nga didto naglantaw kanila sa rehas sa bilanggoan. “Asa ka man paingon Gelyn kun molayas ka sa inyo’ng gipuy-an, may paryente ka ba dinhi?” ni Randy pa.

“Problema lagi sir kay wala ko’y mga paryente dinhi kay taga Leyte man ko. Bahala na og anha sa aseras basta dili lang ko niya mapatay,” mora’g luya ang tinubagan ni Gelyn.

May misantop sa huna-huna ni Randy. “Kun gusto ka, adto na lang puyo sa balay kay aron matabang-tabangan nimo si Mama sa mga gimbuhaton mentras wala ka pa’y kapuy-an,” giingnan ni Randy si Gelyn.

“Salamat sir ha. Sige ako na’ng buhaton,” matud ni Gelyn. Nakasabot si Randy sa kabalaka nga gibati ni Gelyn kay basin og dagmalan na usab siya sa iyang kapuyo kun makagawas na sa prisohan.

Sanglit safekeeping lang ang pagbutang ni David sa prisohan, buhian gayud siya ni Randy kun mahuwasan na sa iyang kahubog. Gihangyo ni Randy ang duha niya ka kauban nga ubanan si Gelyn aron hiposon ang iyang gamit ug ihatud sa ilang balay. Mibiya dayon ang patrol car luwan ang duha ka polis ug si Gelyn aron pagkuha sa mga gamit sa babaye gikan sa ilang gipuy-an sa tumong nga inig gawas ni David dili na sila magkita pa.  

Diha’ng mibanag-banag na, nahibalik ang patrol car nga gisakyan sa duha ka polis. “Tua na ang babaye sa inyong balay part. Luoy diay kaayo kadto siya no kay pirmi lang gidaug-daug,” matud sa duha ka polis.  (Sumpayan)