Gula 145
Wala madugay sa paglakaw ni Rey, nahitukmaan niya ang usa ka hagdanang semento nga susama ang pagkagama sa hagdanan nga iyang giagian kaganina pagsaka sa ikaduhang andana. Nanaog siya agi sa maong hagdanan. Nagdali ang iyang mga lakang.
Igo lang mitugkad ang iyang mga tiil sa silong, si Rey gipusil sa mga kaaway. Nagkabuang siya’g pangita og katagoan aron paglikay sa nagpungasing mga bala gikan sa mga kaaway. Nakapasalipod siya niadtong mga hollow block nga gikamada duol sa dakong haligi. Napaak niya ang iyang mga ngabil.
Paglunga sa mga kaaway nga mipusil kaniya, si Rey migawas sa iyang gitagoan. Mora siya’g iring kumagat nga nakigsangka sa mga kaaway. Kutob sa mga kaaway nga napabor kaniya iyang giluthang.
Pagkilab sa pipila ka daklit, kalit lang usab mitang-on ang buto-buto. Ang iyang mga kauban wala na mopabuto. Nahilom. Mihari sa palibot ang kahilom.
Unya dihay mga anino nga naggimok dili halayo sa gipasalipdan sa maong mga anino. Iya kining gipanid-an pag-ayo. Gipugngan niya ang iyang pagginhawa samtang mianam pagbutho ang mga anino nga iyang nakita. -- Sumpayan pa