Unya wala na magpaabot si Rey og laing libkas sa tipik sa gutling. Gikablit niya ang Uzi nga diha sa iyang walang kamot tumong sa kaaway nga nagtinguha sa iyang kaalaotan. Naigo kini sa iyang pagpusil ug nahagba kini sa salog.
Midali si Rey pagduol sa nalup-ogan sa kaaway. Apan ang iyang mga mata nagmabinantayon sa palibot. Gibantayan usab niya ang kaaway nga wala na maglihok nga nagkulob sa salog. Iyang gisindol palayo niini ang armalite nga naghigda sa salog duol sa nagkulob nga lawas niini. Ang hinagiban milagpot sa igong gilay-on nga dili na makawhat sa kaaway.
Gikahig ni Rey ang kaaway sa iyang mga tiil. Iya kining gipahayang aron pagsuta kun wala na ba gayoy kinabuhi. Nakita niya nga nagsiga ang mga mata niini.
Gibiyaan ni Rey ang kaaway human niya matino nga wala na kini kinabuhi. Mipadayon siya sa unahan. Iyang gitiwas pagsusi ang mga lawak. Gitagsatagsa niya pagsuhid ang palibot sa matag lawak nga iyang nasudlan.
Apan nasuta ni Rey nga wala nay tawo ang maong mga lawak. Human masusi ang tanan, midali siya paggawas ug mipaingon sa dapit sa bodega diin naggikan ang daghang butobuto. Sagol dagan ang iyang paglakaw nga sa matag karon ug unya nagpaningod sa palibot. Tugob sa kamabinantayon ang iyang mga lihok. -- Sumpayan pa