Kiligon kaayo

Dear Tita Salie,

Have a nice day. I am one of your avid readers sa imong column. I really like reading your advice sa mga problems nga ilang ipadala diha kanimo.

By the way, just call me Ms. S., 17 years old, and of course, I am single. Ang akong concern is about this friend of mine. Suod kaayo ming duha ug buotan kaayo siya nako.

Wala nako tuyoa nga nahulog ang akong loob ngadto kaniya. Magsige man mi og teksanay, Tita Salie, ug kiligon kaayo ko sa iyang mga text. Wala gyod siya masayod nga na-inlove ko niya sa hilom. Ug maoy akong gusto nga makahibalo siya sa akong feelings ngadto kaniya.

Maayo kaha nga ako mismo ang mosulti ngadto kaniya mahitungod sa akong feelings? Dili kaha siya malain, Tita, kay babaye baya ko unya akoy mouna niya. Naglibog na gyod ko sa akong sitwasyon. Palihog pasabta ko sa angay nakong buhaton. Thank you so much and God bless.

* * *

Hello, Ms. S. Bisan man kun lahi na ang uso karon, bisan man kun ang mga pareha nato moingon nga “equal rights” para sa babaye ug lalaki, apan when it comes to courtship magpabilin gyud ang akong pagkakinaraan. Mas ganahan gyud ko nga mosunod kun unsay atong naandan.

Busa dili gyud ko uyon nga ikaw ang mouna pagsulti kaniya mahitungod sa imong feelings tungod mamahimo kang cheap niini. Hatagi og bili ang imong kaugalingon aron respetuhon ka sa ubang mga tawo. Ayaw ipaubos ang imong pagkatawo bahala kun dili na uso.

Ang akong isulti kanimo mao nga hulata nga ang guy maoy mouna pagdiga sa ilang feelings diha kanimo. Ug kinahanglan gyod nga mag-amping ka ug ayaw pagpasabot nga inlove kaayo ka niya kay tingali unya kun pahimuslan ka lang niya o kaha sayon-sayonon lang ka niya. -- Tita Salie

Isla Paraiso

Sa dihang gilung-an na ni Rey og kablit ang armalite nga nahutdan na usab sa mga bala niadtong tungora midip-ig siya’g maayo sa bungbong samtang ang iyang mga mata didto ipunting sa kilid sa pultahan. Naniid na usab siya.

Wala makabati si Rey og bisan unsang matang sa kasikas didto sa sulod. Apan wala gihapon siya mokompiyansa. Sa tanang higayon, gigamit niya ang iyang prinsipyo nga dinhi sa kalibotan maoy makabentaha kanunay ang mga segurista.

Unya dihay ideya nga mitungha sa iyang hunahuna. Dihadiha gisipitan niya ang Uzi sa tuo niyang bukton ug gigamit ang iyang walang kamot sa pagtangtang sa basiyong magasin nga gitangag sa armalite nga gikuptan sa iyang tuong kamot. Wala gayod niya ilabay ang armalite bisan wala na kini mga bala tungod kay misantop sa iyang hunahuna nga magamit ra gihapon niya kini sa laing paagi. Ang basiyong magasin nga karon gikuptan na ni Rey iyang gilabay ngadto sa sulod sa lawak. Pagkahagsa niini sa salog, dihadiha milanog ang masipang mga buto sa sulod. Nakapanglingo si Rey sa iyang nadiskubrehan. Kun midiretso pa siya’g sulod sa maong lawak nga nagmingaw sa iyang paniid kaganina, hayan naimpas na ang iyang kinabuhi. Wala gayod siya masayop sa iyang pangagpas nga may kaaway gayod nga naghupo sa maong lawak. -- Sumpayan pa