Gikan ning dos-andanang balay nga akong gikaserahan, nabatyagan ko gihapon ang naglagiting nga kainit sa kaudtohon nga dulot sa adlaw atol ning kasaulogan sa Biyernes Santo.
Naglingkod ko sa balkonahe nga nagdala og usa ka transistor radyo nga nagtingog pinaagi sa bateri. Mi-relaks ko ning adlawa, kay gahapon, nakauban kos akong mga klasmeyt sa kursong civil engineering nga nag-via cruces sa Good Shepherd sa Banawa.
Sa atbang nga tindahan, nasiklapan ko ang mga kauban kong nagkasera ning dos-andanang balay. Nagtinagayay sila si Henry, Boy, Jimmy ug Edgar sa beer grande. Pulos usab sila mga estudyante sa kolehiyo, diha sa unibersidad nga akong gi-eskuylahan. Mga anak sila og sapiang mga ginikanan nga nahilig sa pagpakigbarkada ug inom sa ilimnong makahubog.
“Rey, Biyernes Santo ron! Uban namo sa atbang tindahan! Magdyaming ta! Patay ron ang Diyos ug di makakita sa bisan unsay atong buhaton!†giagni ko ni Henry kaganina, sa dayon na nilang panganaog ni Boy, Jimmy ug Edgar.
Gibalibaran ko sila. Di ko gusto nga matental sa ilang bisyo sa pagpakigbarkada ug inom sa ilimnong makahubog. Samot nga namatikdan ko sila kanunay nga manulod na nianang balay nga unahan og diyutay sa tindahan nga imnanan, nga maoy sekretong suyopanan og shabu nga wala pa gayud madiparahe sa mga tinugyanan sa balaod.
Daghang mga serbis nga sakyanan nga mag-parking sa dalan, aron lang sekretong mosuyop og shabu nianang balay, nga gipanag-iya og usa ka drug pusher ning siyudad.
Gidayal ko ang usa ka estasyonan sa dala kong transistor radyo. Gusto kong maminaw sa mga mamumulong sa tinuig nga Siete Palabras nga ipalanog sa kahanginan sa kapunongan sa mga magsusulat nga naglitok sa Sugbuanong Pinulongan. Unya, nadapit na usab ang akong pagtagad nila ni Henry, Boy, Jimmy ug Edgar nga nanindog na nga pula na kaayo’g mga nawong. Didto na usab kini mopaingon sa balay nga kinoral nga unahan lang og diyutay sa tindahan nga imnanan. Gisugat dayon sila sa lalake nga liraw og mata. Unya, abtik nga nanulod ang upat. Nakapanglingo na sab ko nga naghunahuna sa upat ko ka kaubang kasera nga nagumon na gayud diay sa bisyong paghithit og shabu.
“Wa gyuy kalibutan ang ilang mga ginikanan sa probinsiya nga nagumon sa barkada, inom sa ilimnong makahubog ug paghithit og shabu ang gituhoan nilang mga buotang anak nga nagtinarong sa pag-eskuyla sa siyudad!†nagkitabkitab ang akong baba. Kuyaw pa kaayo kun maaktohan sila sa pag-raid sa taga PDEA.
Unya, maoy nasulod sa akong pandungog gikan sa transistor radyo, ang unang mamumulong sa Siete Palabras nga nagkanayon sa kusog nga tingog: “Amahan Ko, Pasayloa Sila Kay Wala Masayod Sa Ilang Gibuhat...!â€
Ug nahanduraw ko sila si Henry, Boy, Jimmy ug Edgar nga atua na sa sulod sa balay-suyopanan, niadtong orasa sa Biyernes Santo. (Kataposan)