Didto sa luyong bahin sa bodega, nabati ni Rey ang nagkadaiyang buto sa hinagiban. Misantop sa iyang hunahuna nga gikaengkuwentro na usab sa iyang mga kauban ang lain pang mga tulisan. Mipadayon pa gayod si Rey sa pagkamang. Wala siya mokompiyansa. Dili siya buot nga hiunhan sa mga kaaway.
Hugot ang pagtuo ni Rey nga may mga kaaway gayod nga nanghupo sa iyang duol sa palibot sa iyang nahimutangan. Dili lang niya sila makita gumikan sa kangitngit. Naghulat lang sila nga siya mogimok aron ilang pusilon.
Taud-taud may nakita siyang siga sa plaslayit gikan sa ubos. Misantop gilayon sa iyang hunahuna nga may kauban siyang polis nga misunod kaniya. Midali siya pag-ipli ngadto sa usa ka haligi aron dili siya maigo sa kahayag sa plaslayit. Delikado kun matandangan siya sa kahayag sa plaslayit ug kalitan siya pagpusil sa mga kaaway.
Paghimuntog sa kauban ni Rey nga nagbitbit og plaslayit sa ikaduhang andana, kalit kaayong milanog ang masipang mga buto sa kamatayon.
Girakrakan sa mga kaaway ang polis nga nagdala’g plaslayit nga mao pa gayoy paghimuntog sa ikaduhang andana. Maayo kining pagkalukapa nga natusak sa mga bala samtang ang plaslayit nga gigunitan niini nabuak ang salamin pagkahagsa niini sa salog. Apan nagpabilin nga nagsiga ang plaslayit. -- Sumpayan pa