Modus sa kuwaresma

Nahingangha ang magtiayong Amy-Zaldy Caballes dihang may estranyo nga mideretso la’g sulod sa ilang sala, kinsa nagpaila nga usa ka seminarista ug mipahibalo nila nga paryente kuno nila sa sayid sa mga Caballes, kinsa atua na sa Davao nagpuyo.

Desente ang maong tawo. Luis Caballes kuno iyang ngalan. Nagbarong og puti nga may bulawang priest’s cross pin nga gitusok sa kuwelyo, diin giparesa’g black slack ug sinaw, itom, panit sapatos.

Nangayo kini nilang Zaldy’g hinabang pinansiyal alang sa biyahe niini paingon sa Roma kay paadtoon kuno silang mga seminarista ni Pope Francis aron patambungon sa Urgent Spiritual Enhancement Seminar nga molungtad og lima ka adlaw.

“Kun naa kay dolyar, Tito Zal, kana lay ihatag. Kay dollar baya ang kuwartang gamiton didto.” Wala’y lipodlipod nga pangayo sa batan-ong tambok. Ug mao ni ang nahibudngan ni Zaldy. Wa man gani siya makaila kinsa gyud ning tawhana, unya giyanoyano ra man siya? Gitawag pa siya’g Tito Zal?

Gisulaya’g puga ni Zaldy iyang utok pagsubay kun aduna ba sila’y kadugo didto sa Davao. Apan wala man gyod siya’y nahinumdoman?

Gibalibaran ni Zaldy ang seminarista. Giingnan niya: “Pasensiya. Wa pa mi suweldohi ug wala pa sab mi padad-i’g dolyares sa among Papa’g Mama. Mao nga wa gyud mi ikahatag nimo karon.” Mopadayon pa unta’g esplikar ang seminarista dihang...

Mitingog ang selpon niini. Dunay mipadala’g mensahe. Busa gibasa. Kalit lang nausab ang hitsura sa seminarista. May kahingawa iyang nawong. Unya, nagdalidali nga mipaingon sa gawas ug miangkas sa motorsiklo nga nakaparada na daan didto sa balay nilang Zaldy.

Wala madugay, may mga pulis nga miabot sa balay nilang Zaldy ug nangutana: “Hain ra tong tawhanang nagpakaaron-ingnong seminarista?”

“Bag-o lang gyong nakalarga, Tsip, sakay’g motorsiklo. Kay kinsa man diay tong tawhana, Tsip?” Bawos-sukna ni Zaldy.

Swindler to. Ubay-ubay nang mga dato ang nangailad adtong tawhana. Mao nga dihang dunay nakapahibalo namo nga mangilad na sab unta siya dinhi sa inyo, miari dayon mi aron dakpon ang kagwang. Di mi makatugot nga kining bag-ong modus nila sa pagpangilad ning panahon sa kuwaresma, dili mahunong.

“Mao ba, Tsip?” Mora’y nasulti ni Zaldy, kinsa didto pa makaila kinsa diay kadtong tawhanang namaryente niya kagahina. “Bantog ra, misibat dayon!” (Kataposan)