Gula 2
Wala makabalibad si Mamer sa tanyag sa iyang higala nga nagtrabaho sa National Statistics Office nga tabangan siya ug ang kauban niini nga si Sherlyn aron dali ra nga makakuha sa gikinahanglang dukomento.
Wala g’yud tinuod magdugay ang ilang pagpaabot kay mga alas diyes sa buntag nakuha na nila ang ilang gikinahanglan. Human makapasalamat sa iyang amigo nga nagtrabaho sa NSO, nagkuyog sila si Mamer ug Sherlyn paggawas sa opisina.
Sa dayon nila’ng gawas sa NSO, ilang naagian ni Sherlyn ug Mamer ang daghang tawo nga naglinya pa nga gusto’ng mokuha og dukomento, kasagaran mga birth certificate. Dali ra nga nagkasuod sila si Sherlyn ug Mamer.
“Unsaon diay nimo ang imong gikuha nga birth certificate sa NSO,†gipangutana ni Mamer ang dalaga. Dugay’ng mitug-an si Sherlyn apan sa ngadto-ngadto nakatug-an ra gayud kini nga gamiton niya ang birth certificate sa iyang pagminyo.
“Mao ba? Congrats diay daan Sherlyn. Pagka-swerte baya sa imong mabana nga gwapa kaayo siya’g asawa,†gipakapinan pa g’yud pagkomedya ni Mamer. “Unya, asa ka pa karon Sher? Modalikyat usa ko sa SM kay duna ko’y paliton,†matud ni Sherlyn.
Gisukna ni Mamer ang dalaga kun mahimo ba nga ubanan niya kini paingon sa mall. “Oki ra uy, dili ka man kaha magpakugos?†sagol komedya ni Sherlyn.
Kanunay’ng gipasiplatan ni Mamer ang bayhon ni Sherlyn. Alang kang Mamer wala gayud mosipyat ang iyang pamanhonon sa pagpili sa dalaga kay pwerte ka madanihon niini ang iyang lawas. Nakabantay diay si Sherlyn nga nagsigi og pasiklap si Mamer sa iyang lawas. Dihang tingpaniudto na, nanulod sila og kan-anan. Human maka-order sa ilang pagkaon, nangita sila og bakante nga lamesa ug didto sila nagpahimutang. Wala makabantay si Sherlyn nga adunay kaila sa iyang pamanhonon nga nakakita kanila.
Samtang nangaon sila si Mamer ug Sherlyn, miduol kanila ang babaye nga suod sa pamanhonon ni Sherlyn apan igo lang kini nga mipahiyom. Gikulbaan si Sherlyn kay nabalaka siya nga lainon unya sa pagsabot sa mao nga babaye ug magtoo nga may relasyon sila si Mamer.
Wala g’yud tuod masayop si Sherlyn kay taud-taud nakadawat siya’g text message sa iyang pamanhonon. Nasabot ni Sherlyn nga nasuko ang iyang boyfriend. Nangutana kini kun asa siya pagka karon ug kun kinsa ang iyang kauban.
Gitug-anan ni Sherlyn ang iyang boyfriend nga kaila ra niya ang iyang kuyog ug didto sila nagkita samtang naglukat siya’g birth certificate. Wala na makadawat pa’g reply si Sherlyn gikan sa iyang boyfriend. Giusban niya pag-text apan wala na kini motubag pa. – (Sumpayan)