Ang uwang sa iro ni Sabel mangtas

Matag abot gyud sa kilomkilom mabati dayon sa mga silingan ang uwang sa iro ni Sabel. Ang balay ni Sabel naa mahimutang sa ilawom sa tulo ka dagkong punoan sa mangga. Ug medyo nalayolayo kini sa nanagtapok nga kabalayan dinhi sa sityo Yamog-Tun-og.

Ug kay dalagang guwang man kini si Sabel, duna say mga ulitawong guwang nga nangulitawo kaniya. Sila mao si Pitoy, Banong, Kurak, Rito ug Elyong nga taga sityo.

Ug kay si Sabel na man lang ang nagpuyo sa karaang balay maong namuhi kini’g duha kabuok iro. Iyang ginganlan si Kabang ug Itom. Si Kabang mao ang pinakamaldito sa duha ka iro ni Sabel kay kun makakita’g tawo mohamag gyud lahi sa iro nga itom nga kun dunay tawo nga mamisita kang Sabel, mokitiw ang iko’g niini nga mora’g motimbaya ug moabi-abi sa bisita sa dalagang guwang.

Ka usa, namisita si Elyong kang Sabel ug naatol nga naligo si Sabel diha sa likod sa ilang balay. Ug wala tuyoang milipot si Elyong ug maoy mibantang sa mga mata ni Elyong ang hubo nga lawas ni Sabel.

“Hoy, Elyong, balik didto sa tugkaran, kay naligo ko,” ni Sabel pa. “Naghubo ra ko...”

Midalig balik si Elyong ug gisugat siya ni Kabang nga  mingulob apan wala mohamag. Diha pud si Itom nga miduol kang Elyong ug mikitiw kitiw ang ikog niini.

Unya, daghan ang nakugang sa kalit nga pagkawala sa mga ulitawong guwang nga namisita kang Sabel. Si Elyong ra gyud ang wala maparehas sa ubang mga ulitawong guwang nga nangahanaw. Hain kaha sila?

Ug dunay tabitabi nga gibalbal kuno ni Sabel kay si Sabel maoy gibinlan sa inahan niining mangtas sa pagka-ungo. Ug matag gabii maoy mabati sa mga silingan ang uwang sa duha ka iro nga magpulipuli dayon mosunod ang langgis kaayong tingog sa wakwak. Ug dunay mosinggit ug mosangpit sa ngalan ni Sabel. Si Tibong nga malditohon iyang gisinggitan ang wakwak.

Niya pa, “hoy, wakwak! Sayod kong ikaw si Sabel, hilom diha, aron dili tika romansahon, ibog ra ba ko nimoooo!”

Unya kalit lang mitugpa ang wakwak. Usa ka babaye nga kalkag kaayo’g buhok ang miduol kang Tibong.

Unya, gibugno si Tibong. Nagpaninggit og pakitabang si Tibong apan way nakadungog niya. Taudtaod nabati sa mga silingan ang uwang sa duha ka iro ni Sabel. Dayon, nabati pud nila ang tingog ni Elyong nga nagpanawag kang Sabel.

“Sabell! Sabellll!!! Sabelllll!! Pauliiii naaaa! Kay gigutom na kooooo!!!”

Dinhi nagtuo na gyud ang mga silingan nga si Elyong natakdan na sa pagka mangtas nga ungo kay tua na man siya puyo ug ipon sa ka Sabel mangtas. (Kataposan)