Dear Tita Salie,
Hello! Good day. Nasayod ko nga daghan na kaayo ka og natabangan. Hinaut unta nga imo kong matabangan niining akong problema karon.
Pero una sa tanan tagoa lang ko sa pangalan nga Avloi, 22 years old. Ang akong problema mahitungod kini sa motor nga akong giutang.
Gihulaman man gud kini sa akong magulang ug matud niya nga usa ka semana niyang gamiton. Apan paglabay sa duha ka semana wala na nako makit-i ang akong motor. Dihang akong gipangutana ang akong igsuon nangambot lang siya ug mora’g way pakialam. Akong giadto ang iyang kauban, kay duna man siya’y kauban dihang ilang gihulaman ang motor apan nagtulod-tulod na silang duha.
Karon, Tita, wala na pud ko kadata sa motor kay wa na man ko’y trabaho. Unya giingnan ko sa akong gikuhaan sa motor nga ila kong ipapreso kun dili mabalik ang motor. Unsa may akong buhaton, Tita Salie? Palihug pasabta intawon ko. Daghang salamat sa pagtagad ning akong problema.
* * *
Maayong Adlaw,
Duna gyud kay tulobagon sa kompanya sa maong motor nga imong gikuha tungod kay wala pa man kini mahuman og bayad. Busa kun nawagtang man kini, bisan wala na kay trabaho obligado gyud ka nga mobayad niini.
Kun nangutang gud ka, unya dili na ka makabayad sulod sa pipila ka bulan ilang bawion ang unit nga imong giutang. Apan since wala na sila’y nakuha kay nawagtang ang unit, paningkamuti na lang nga makadata ka matag bulan.
Adtoa ang imong igsuon, patabanga siya og bayad kay siya man ang nakawagtang niini. Ambot kun nganong imo mang gipiyal sa imong igsuon kun nasayod ka nga dili siya kasaligan.
Tabangi na lang ninyo og bayad tungod kay ikaw man gyud ang ilang gukuron kay imo mang pangalan ang utang. Adtoa ang imong gikuhaan sa unit ug pasaligi nga imong bayaran. -- Tita Salie