Dear Tita Salie,
Maayong adlaw kanimo ug sa tanang nagsige’g basa sa pasabta ko labina karong orasa.
Tagoa lang ko sa pangalan nga Mikaela Beatriz, usa ka single mother. Ang akong problema mao kining kabahin sa father sa akong anak.
Five years old na ang akong anak, Tita Salie, apan ako ra gyung usa ang nagbuhi ug nagpadako kaniya tungod kay salbahis kaayo ang iyang amahan. Dili mi niya tagdon ug i-deadma ra gyud mi niya.
Puyde ba nako siyang makiha o kaha puyde ba nako siyang mapugos pagsuporta sa among anak? Unsa man ang maayo nakong buhaton? Palihug pasabta ko. Thank you and more power.
* * *
Good day Mikaela Beatriz,
Puwede nimo siyang mapatawag sa mga tawo nga may authority aron sa pag-ariglo kaninyo.
Dili pa puwede nga dihadiha imo dayon siyang pasakaan og kaso. Imo una siyang papermahon sa inyong kasabotan nga muhatag siya’g suporta matag bulan. Kay ang amahan duna gyud siya’y responsibilidad nga mutabang sa iyang anak. Muhatag gyud siya’g suporta kun pila ang iyang makaya.
Niining paagiha dili na gyud mo puyde nga i-deadma pa kay anaa na man siya’y saad ug iyang gipermahan uban sa mga witnesses nga maoy mi-areglo kaninyo. Unya kun dili niya matuman ang iyang saad nga muhatag og suporta sa inyong anak, kun iya lang gihapon mo nga i-deadma well, mao na kini panahon nga imo siyang isumbong. -- Tita Salie