Sarcastic

May panultihon nga nag-ingon “if you cannot say something nice, bet-ter say nothing.” Pero may panahon nga bisa’g nindot pa ang imong gisulti ug maayo imong intensiyon sa pagsulti, dautan gihapon ka sa naminaw.

Labi na’g hugaw na daan og hunahuna ang naminaw ug wa kauyon o kaila sa nagsulti. Ingon ini nahitabo ni Atty. Tomas Omol. Wa pa nagsugod ang bista pagsulod niya sa husgado usa ka buntag. Diha na ang stenographer ug interpreter. Unya nagsige siya’g tan-aw sa palibot sa husgado kay daghang mga adorno. Unang higayon pa siyang nakasulod ining husgadoha nga out of town.

“Nindota gyud sa mga sayings ug adorno sa mga bungbong sa husgado. Educational kaayo. Dagha’g makat-onan ang mga abogado ug mga litigants sulod ning husgadoha!” ni Tomas nga mapahiyumon. Unya ang duha ka babaye (stenographer ug interpreter) lai’g tinan-awan ni Tomas human sa iyang pagsulti. Nagdungan og sulod sa chamber sa huwes ang duha ka babaye. Unya pagkataudtaud, may diyanitor nga nanangtang sa mga adorno. Nahibulong si Tomas.

Pagtawag sa iyang kaso, gilisudlisod siya sa huwes. Bisan simple kaayo ang kaso ni Tomas, paisyu og bag-ong titulo hulip sa nawala. Way kontra, way opositor, lig-on iyang ebidensiya. Niingon ang huwes (nga babaye) dismiss iyang kaso kay way lig-ong ebidensiya. Puwerteng dismayoha ni Tomas. Bad shot siya’s iyang kliyente. Pending pa sa Court of Appeals ang iyang kaso hangtud karon. Kay iya na lang gi-apelar.

Nagmahay siya’s iyang nasulti. Sarcastic tingale siyang tan-awon o paminawon. Bisa’g sinsero iyang pagsulti. Kamo nala’y tan-aw sa dictionary unsa nang sarcastic. Kay way direktang Binisaya. Ang sarcastic, kanang maayo o nindot imong gisulti apan dautan o binale ang sabot sa naminaw, tungod tingale sa tunada sa pagkasulti.

Ang leksiyon nakat-onan ni Tomas, pinakamaayo ang “No comment” policy. Kay bisa’g maayo pa ang intensiyon sa imong pag- comment, may purohan, dautan ang panabot sa naminaw. (Kataposan)