“Tingali, sister Veronica, maoy gihimong paagi sa Diyos ang pagsulod mo sa kumbento aron malingaw mo ang imong kaugalingon ug masabtan mo ang imong kaugalingon,†nagkanayon ang madre superyor, “ug masabtan mo ang kamatuoran nga sa kinabuhi sa tawo anaa ang daghang mga baligho, nga modangat ang mga panghitabo nga dili nato gustong mahitabo. Ug karon nga naka-recover ka na sa hingpit niadtong trahedya nga nahitabo sa imong gugma, si Rey ang gihimong instrumento sa Diyos aron mabuka ang imong mga mata kun unsa gayod ang kalibotan nga angay mong puy-an.â€
Wala gihapon motingog si sister Veronica. Nagpitok-pitok ang iyang mga mata. Gipalugdang niya sa iyang alimpatakan ang tanang mga pulong nga gilibkas sa mga ngabil sa madre superyor.
“Kun ikaw alang gayod sa Ginoo,†mipadayon na usab ang madre superyor, “wala’y mahimo si Rey. Apan mibati ka’g kaluoy kaniya. Karon nga nakahukom ka na sa pagbiya sa kumbento, naseguro ko nga nakat-on ka na sa pagmahal kaniya. Ayaw sabta nga huyang ka. Dili. Nahitabo kini tungod kay usahay, ang mga butang nga atong pangayoon sa Diyos dili Niya ihatag kanato kun kini wala mahasubay sa Iyang balaanong plano alang kanato. Kinahanglan nga ang kabubut-on sa Diyos maoy matuman dinhi sa yuta maingon man sa langit kay mibati ikaw og pagmahal kang Rey taliwala sa maduloton mong pag-ampo nga dili ka mabuntog sa tawhanong pagbati, kana nagpasabot nga mao kini ang kabubut-on sa Diyos alang kanimo.†-- Sumpayan pa