Isla Paraiso

Gidaygan dayon ni sister Veronica ang madre superyor sa iyang hukom sa paggawas sa kombento ug pagluwat sa iyang bokasyon. Daw gihan-ay nang daan ang mga pulong sa madre nga larino na kaayong mipasabot sa madre superyor sa mga katarongan nga nagpaluyo sa iyang hukom. Mora ba’g gisansan na niyang daan ang iyang igsusulti sa wala pa siya makig-atubang sa madre superyor. Mao nga sa ilang panagsulti, tul-id kaayo ang mga pasabot ni sister Veronica.

“Sa gikaingon ko na kanimo, sister Veronica,” nagkanayon ang madre superyor, “ang kombento wala’y katungod sa pagpugong ni bisan kinsa nga buot mogawas. Kun dili na gayod matuis ang imong hukom ug segurado ka na nga si Rey ang imong pilion, padayon.”

“I’m sorry, Mother Superior,” nakaingon si sister Veronica.

“No,” sa madre superyor pa. “Dili ka angay mangayo og sorry, my dear. Nagtuo ka nga mao kini ang kabubut-on sa Diyos alang kanimo. Usahay ugod, likoliko ang dalan nga ipasubay sa Diyos kanato. Sa kinabuhi sa tawo, anaa ang daghang sakaon ug dulhogon nga dalan.”

Kahilom.

“Nasayod ko sa story behind sa wala ka pa magmadre,” mipadayon ang madre superyor. “May hinigugma ka nga namatay. Gikaguol mo ang nahitabo kaniya. -- Sumpayan pa