Naglakaw si Rodel sa Osmeña Boulevard mga alas nueve sa buntag samtang nagpaingon siya sa opisina sa National Bureau of Investigation (NBI) aron molukat siya’g clearance. Nalantawan ni Rodel ang usa ka babaye nga naglakaw usab sa unahan.
Gipaspasan ni Rodel ang iyang mga lakang aron mapaduol siya sa babaye nga nakapadapit sa iyang pagtagad. Porma man gud kaayo’g lawas ang babaye bisan og nagsul-ob kini’g bestida.
Porma kaayo ang iyang hawak ug klaro kaayo ang igwad niini nga sampot. Distansya ra g’yud og mga usa ka dupa si Rodel sa babaye ug didto ra g’yud mapunting kanunay ang iyang panan-aw sa hawak.
Nakapanglad-ok gud si Rodel sa iyang laway nga nagsud-ong kay hilabihan ka “fertile†sa iyang imahinasyon nga naghanduraw sa kalalim kun magakus niya ang maong babaye. “Wow, kanay lawas,†tuaw ni Rodel.
Apan sa tanto nga pagtutok ni Rodel sa hawak sa babaye, duna siya’y nabantayan. Nabungkas ang siper sa bestida sa babaye ug nag-anam-anam kini og buka. Diha ra ba sa tunga nga bahin sa siper ang nabungkas.
Wala masayod si Rodel kun unsay iyang angay’ng himoon. Gusto niya nga pahibaw-on ang babaye apan nagpangikog siya kay basin og lainon unya kini pagsabot.
Nakabantay si Rodel nga pareho sila’g rumbo ang babaye. Mora’g sa NBI usab paingon ang babaye kay miliko na man kini pag-abot sa dalan Escario atubangan sa Kapitolyo.
Gibaliwala na lang g’yud ni Rodel ang kaikog. Gipaspasan pa niya ang mga lakang aron magkatupad sila paglakaw ug ang babaye. “Miss, adto ka ba ‘sab sa NBI paingon?†matud ni Rodel. Mipahiyom ang babaye ug miyango. Mingisi ‘sab si Rodel ngadto sa babaye. “Magkuyog na lang ta kay pareho man diay kita og rumbo. Yuna pa, pahibaw-on tika miss nga naguba ang siper sa gisul-ob nimo nga bestida,†giingnan niya ang babaye.
Nakurat pag-ayo ang babaye pagkadungog ug mikalit paghunong. Gihikap niini ang luyo nga bahin sa iyang bestida. “O tuod no? Hala uy, unsaon nako ani ron,†sa babaye pa.
“Palitan lang nato og arpiler diha sa tindahan. Ayuhon nato pagtaud nga dili makita,†matud ni Rodel. Nagkuyog sila sa duol nga tindahan. “Ako diay si Rodel miss,†paila niya sa babaye. “Alfie sab ang akong ngalan,†sa babaye pa.
Si Rodel pa maoy mitaud sa arpiler aron dili na mobuka ang siper sa luyo nga bahin sa bestida ni Alfie. “Salamat kaayo Rodel ha? Kun wa pa ko nimo pahibaw-a, kataw-an g’yud unta ko kay modaku man to pagbuka,†matud ni Alfie. (Sumpayan)