Isla Paraiso

Gula 109

Tuod man, gipakigsultihan ni Rey ang madre superyor sa Orchids Sister’s Convent. Nag-ukon-ukon siya sa pagpadayag sa iyang tuyo sa madre superyor. Apan gumikan sa kadako sa iyang tinguha nga makakuyog si sister Veronica kaniya sa isla Paraiso, nangahas gayod siya sa pagpananghid sa madre superyor.

Sa dakong kahinangop ni Rey, misugot ang madre superyor.

“Misalig ako kanimo SPO3 Corpuz,” nagkanayon ang madre superyor, “mao nga mosugot ko nga imong ikuyog si sister Veronica sa pagpanuroy.”

“Daghang salamat, Mother Superior,” ni Rey pa. “Ayaw kabalaka. Ampingan ko si sister Veronica.”

“Salamat kun mao kana,” sa madre superyor pa. “Kun mahimo unta labing maayo nga makabalik na kamo dinhi sa dili pa mogabii.”

“Paninguhaon namo, Mother Superior.”

Ug wala maglangan si Rey. Human makigsulti sa madre superyor, nanggikan gilayon sila si Veronica. Nagpahatod sila’g taxi paingon sa Carbon diin didto sila manukad paingon ngadto sa isla Paraiso.

Ang isla Paraiso nahimutang sa taliwala sa lawod habig sa habagatang Sugbo. Dili kaayo dako ang maong isla apan kini nakaangkon og katahom nga wala mabatoni sa ubang mga pulo nga nahisakop sa lalawigan sa Sugbo. Puti kaayo ang pino ug timgas nga bunbon sa baybayon niini. Hilabihan katin-aw ang dagat. -- Sumpayan pa